Daily Newspaper

City an tlawm chiang

15

Pathianni zana English Premier League khelhah champion tura rinkai Manchester City chu chiang zetin an tlawm a. Leicester City in 5-2 ngawtin an sawp. Inkhel dangah vanduaithlak takin Tottenham an chak zo lova, West Ham United in Wolves an sawp ve thung.

City an pawr zuih
Etihad Stadium-a inkhelah hian City in tha zetin bul an tan a, minute lina lekah Riyad Mahrez chuan a club hlui laka hma an hruaina goal a thun. Hma takah goal an thun vangin phur takin an inlan zui a, point thum hlawhchhuak thei tura ngaih an ni. An tlarhnung pher tak an tawrh hle bakah penalty vawithum ngawt an chawi teh reng a, an tualzawlah ngei an tlawm chiang han han hle. Hma taka an goal chhuah hi minute 37-naah Jamie Vardy chuan penalty atangin a sut a, 1-1 a inhnehtawk chungin chawlhlawk an hmang.

Chawlhlawk hnu lamah Foxes in an khel tha zual sauh a, minute 53-naah Vardy chuan hma an hruai letna goal a thun. Minute thum hnu lekah penalty atangin Vardy hian goal a thun zui leh nghal zat a, team lian lakah hattrick a puitlin. Minute thum chhung leka goal hnih ngawt an chhuah vangin City an talbuai nasa leh zual hle. Minute 77-naah James Maddison chuan City tlar hnung pherh tak chu a hrem a, goal kilah mawi zeta thlawlh lutin an goal lina a thun. Goal thum ngawta an hnufual hnuin City tan an defender thar Nathan Ake chuan tuah goal in, minute 84-naah an si phurh a sut then. Hun tawp dawn hnaih minute 88-naah City an vanduai zui leh a, a vawithum nan penalty an chawi. He penalty hi Tielemans chuan a pet goal a, an chakna a nem nghet.

An mualah ngei Leicester ngam lovin 5-2 ngawtin an tlawm a, hei hi manager a nih hnua Pep Guardiola chetchhiat ber tum niin, game 686 zet a kaihruai tawhah a team ten goal nga ngawt an chhuah vawikhatna niin a vawikhat nan hun chhe tak a tawng. Pep Guardiola-a’n a chhe lama record thar a siam lai hian Foxes hian a tha lamah record thar an siam ve thung a. EPL chanchinah khelh khatah penalty atanga goal thum thun hmasa ber leh awmchhun an ni.

Inkhel dang
Pathianni zana EPL inkhel dangah London hmar veng club lian Tottenham an vanduai a, an mikhual Newcastle United lakah uiawm takin an chak zo lo.

Tottenham hian minute 25-naa Lucas Moura goal thun hmangin hma an hruai reng a, an chakpui teuh hle. Hun tawp nan hmanrik a ri tep tawh tihah Tottenham hian handball vangin penalty an chawi a, minute 90+7-ah Callum Wilson chuan pet goal in an si phurh a sut a, Spurs chak tur dangin khualmualah point khat hlu tak an hlawhchhuak zui ta a ni.

Inkhel dangah West Ham in 4-0 in Wp;ves an hneh a. Kaithar Leeds United chuan khualmualah Sheffield United an hneh ve bawk.

(THE AIZAWL POST – Infiamna)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy