Daily Newspaper

City in Grealish an hnaih

10

English Premier League champion Manchester City chuan Jack Grealish an la thei ngei dawn niin a lang ta a. Sportmail in a tarlan danin club pahnihte hi England midfielder Grealish manah £100 million in an inrem a. Nimin khan an inlalut fel hman dawn niin a tarlang tel bawk. Grealish hian City a zawm fel a nih chuan British player manto ber a ni ang.

Midfielder ball thiam, hruaitu tha nih tling bawk Jack Grealish hi a lakchhuah theihna zat chu £100 million a ni a; hetiang zat hian Manchester City hian kar liam ta khan lei dilna an thehlut fel tawh. A lakchhuah theihna zat (release claused) a City in an ngam miau vangin Villa tan ui beh hleihtheih a ni lo va, ama’n club lian zawk pana chhuah a lo duh ve bawk nen Villa hian ‘ngai chung zelin mangtha’ tih mai loh chu sawi tur dang an nei tehchiam lo. Heti a nih vang hian Aston Villa captain hian club lian leh hausa Manchester City a zawm fel thuai tura ngaih a ni ta a ni.

England midfielder Jack Grealish hian thawhtanni atang khan Aston Villa training a zawm leh tawh a. A chawrchhuahna club Villa hi a ngaina in a zah hle a, City pan chak hle mahse kawhmawh bawl kual vel a tum lo. Villa sporting director Johan Lange nen a hmalam hun tur chungchang an sawi dun dawn a. Inpawh leh inhrethiam tawn taka an indawr theih a beisei. Season liam taah pawh khan EPL club lian zawk ten Grealish hi lak an lo duh hle hlawm tawh a, Villa pawhin an captain hi an ui ber zo lo teuh hle nghe nghe. Villa Park chhuahsan lovin a cham zui a, a hnu lawkah contract thar a ziah belh zui leh bawk. Contract thar a ziah vang hian a man pawh a to lo thei lo va, a lakchhuah theihna zat pawh £100 m a ni ta daih reng a ni.

Villa hi season tharah khawng zawka inlan tumin an inbuatsaih nasa hle a. Bayer Leverkusen winger Leon Bailey an lak luh fel hnuin Southampton midfielder James Ward-Prowse, leh Chelsea forward Tammy Abraham lak tumin an dawr leh mek bawk. An duh zawng player an la thei a, Grealish an la thei a nih chuan inringtawkna sang tak nen Premier League-ah an inlan thei ngei ang.

Premier League champion Manchester City pawh hian an squad thuam chak thar an tum viau a. English player tha Jack Grealish leh Harry Kane lak tumin thapui an thawh mek. Tarlan tawh angin Aston Villa captain Jack Grealish hi an la fel thei tep tawh a. Harry Kane lak tumin an insawrbing thei tep tawh.

England captain, English Premier League-ah vawithum ngawt top-scorer ni tawh Harry Kane hi Tottenham chuan £160 million an chhiar a. City hian £130m a lak tumin an dawr mek thung. Tottenham ngaina hle mahse inelna liana champion a chak vangin Kane pawh hian Spurs chhuahsan a City zawm ngei a chak tak zet. City zawm a chak vang hian kawh-mawh a bawl mek a, Tottenham training a la zawm duh lo zel. City in Kane hi an lei fel leh thei a nih chuan British transfer record thar siamtu Jack Grealish record siam a khum leh nghal dawn. British player to ber a ni thar ve leh ang.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy