Daily Newspaper

City in hma an hruai fal

41

January ni 1, Inrinni zan khan English Premier League khelh chhunzawm leh nghal a ni a. Hmahruaitu Manchester City chuan si an phurh hmasak zet hnuin Arsenal an hneh let a. Thawhtan zanah Liverpool leh Chelsea an inhnehtawk vangin City hian point 10 zetin hma an hruai fal tawh.

City an vannei
Emirates Stadium-ah mualneitu Arsenal an khel tha viau a, hmahruaitu City meuh pawh che hleithei lovin an siam a ni ber. Gunners hian chawlhlawk hmain game an thunun lehzual a, second half tirteah an defender Gabriel hnawhchhuah an tuar a, an mualah uiawm takin tlawm zawkah an tang.

Arsenal manager Mikel Arteta chuan a team hlui (asstant manager a lo nih tawhna) City a hrechiang viau a, a pu hlui Pep Guardiola tactic dang chat turin a player te an rem fuh viau bawk. Kawng hrang hranga an mikhualte an chungtlak hnuin minute 36-naah rawlthar duhawm Bukayo Saka chuan hmahruaina goal a thun ta nge nge. English rawlthar duhawm Saka hian fak a hlawh hle a. Arsenal leh England tantute chuan ‘Arjen Robben thar’ nai ang hialah an inngai hial nghe nghe a ni.

Team hmuhnawm Arsenal hi second half tir lamah an vanduai ta tlat thung. Minute 57-naah an defender rinrawl Gabriel chuan penalty a chawi a, a vawihnihna atan yellow card a hmuh vangin hnawhchhuah a ni zui bawk. He penalty hi Riyad Mahrez chuan pet goal in, an si phurh a sut. Goal thuna an si phurh an sut vang leh tam zawk an nih vangin Manchester City an phur zui viau a, chak ngei tumin an khingpuite an nawr na hle.

Hun pangngai tawp thlenga goal a luh belh theih loh vangin chak zawk an awm dawn lo niin a lang hman. Hun tawp rat thlengin City an beidawng duh lova an che fuh ta nge nge. Minute 90+3-ah Rodri chuan City tan goal hlu zet mai, hma an hruai letna goal a thun. Rodri goal thun hi Gunners tan sut lehna hman a awm tawh lova, an mualah uiawm taka tlawmin point an hlawhchhuak zo ta lo a ni.

Champion lai Manchester City hian champion nawn leh turin hma lam pan chak hle a, point 10 zetin hma an hruai fal der tawh. Arsenal an hmachhawn hnu khan vawi 21 khel tawhin point 53 an hmu tawh a, point an hmuhzat chiah chiah an khingpuite lakah goal an thun tawh a, goal 13 an chhuah ve tawh thung. Season bul tan tha lo mahse an tunhnaiah an khel tha chho viau a. Hmahruai tu Chelsea an pelh hnuin an sang fal chak ta zui hle a. Champion nawn leh turin an dinhmun a tha sawt viau a ni.

Inrinni zana inkhel dangah London club pahnih Tottenham Hotspurs leh West Ham Unuted nen hnehna an chang ve bawk. Spurs hian manager thar Antonio Conte hnuaiah hma an sawn chak hle a. Chelsea manager hlui Conte hnuaiah tlawm nei lovin an kaltluang zel rih. Hetihlai hian West Ham erawh an tlahniam hret hret thung a. Inrinni zanah hnehna chang mahse top 4 huangah an let leh thei rih lo thung.

Chelsea in Liverpool an chelh
January ni 2, Pathianni zan khang English Premier League-ah inkhel ngaihven hlawh tak a awm a. Chelsea leh Liverpool te chuan Stamford Bridge-ah pahnihna nih an inchuh. Inkhel hmuhnawm taka bul tan tha Liverpool chu Chelsea in an chelh thei hram a, 2-2 in an inhnehtawk.

Stamford Bridge-a lenglut Liverpool hi hripui leh hliamin tibuai viau mahse an khingpui Chelsea an ngam viau thung a, bul pawh an tha viau bawk a, minute 26 chhungin goal hnih an thun hman. European champion lakah bul tan tha viau mahse chawlhlawk hma vekin goal hnih an chhuah ve leh thung a, an chaak zawk loh vangin pahnihnaah an inhlangkai thei lo.

Stamford Bridge-a huangtau tak Liverpool tan hian minute 9-na lekah Sadio Mane chuan hmahruaina goal a thun. Hma takah Liverpool in goal an thun hi inkhel tihmuhnawm lehzualtu a ni zui a, chak tuma team lian pahnihte innawr tawn a hmuhnawm thei viau. Phur leh thatho taka inlan Reds hian minute 26-naah goal an thun belh zui leh a. Season kal meka khel tha, goal thun reng mai Mohamed Salah chuan an hmahruaina tizau turin an goal hnihna a thun belh zui leh.

Khingpui hautak lakah goal hnih an chhuah hnuin Chelsea an buai mai lova, huaisen takin an mualah inlan zuiin, Thomas Tuchel chuan a thluak that a lantir nawn leh. An si phurh sut ngei tuma thapui an thawh chu chawlhlawk dawn hnaih ah an chhawr tangkai ta nge nge. Minute 42-naah midfielder Mateo Kova-cic chuan goal thunin an si phurh a sut. An si phurh an sut hnuin an khingpuite na zawkin an nawr zui leh nghal chat a. Chawlhlawk dawn tep minute 45+1-ah Christian Pulisic chuan goal thun zui leh zatin, an si phurh a sut zo ta nge nge a, 2-2 a inhnehtawk chungin chawlhlawk an hmang.

Chawlhlawk hnu lam ah chak zawk nih ngei tumin tan khawh dun viau mahse goal an thun belh thei lo ve ve a, 2-2 a inhnehtawkin an in thathen ta a ni.

An mualah tlawm pumpelh a, Liverpool an chelh theih vangin Chel-sea chu pahnihna an ni chhunzawm a. Reds nen an inkarah point khat a tlazep. Khingpui hautak Liverpool an mikhual tum hian Chelsea player manto ber Romelu Luka-ku chu squad-ah telh a ni lo. Inter Milan atanga an lak let Lukaku hian club thuneitute phalna la hmasa lovin interview a hmachhawn a. Chelsea-a a hlim loh thu leh Inter Milan-a kir leh a chak thu a sawi vangin a chungah manager Thomas Tuchel leh club thuneitute an lawm lo hle a. Lukaku hrem nan squad-ah an telh lo zui ta hial a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy