Daily Newspaper

City leh Tottenham an chak

16

Nilai zana Premier League khelhah team lian Manchester City leh Tottenham ten hnehna an chang a. Champions League khelh phak tuma hma lam pan Wolves chak tur chu hun tawp tep-a goal hmangin Burnley in an dang ve thung.

City chak tluang
EPL an khelh hnuhnung pahnihah singa fai ve ve a hnehna chang Manchester City chuan an mualah teal talbuai AFC Bournemouth an hmachhawn a, Silva leh Jesus goal thun hmangin hnehna an chang a, an goal an venghim thei lova, goal an chhuah ve ta tlat thung.

Atihad Stadium-a inkhel ah hian City in bul an tan tha hle. Minute 6-na lekah an captain David Silva chuan hmahruaina goal a thun nghal pang. Season tawp ruala City chhuahsan tawh tur Silva hi a chetha zui hle nghe nghe. Minute 39-naah Gabriel Jesus chuan an goal hnihna a thun a, Jesus goal thun tur hi Silva siamsak a ni. Silva hian Etihad Stadium-a cham zui lam a ngaihtuah lova, club dang pan ngei tawh a tum. A hun hnuhnung lamah a chetha chho viau a, a chhuak mai tur hi City tan a uiawn hle ngei ang.

City hian hun rei tak chhung si hnih faiin hma an hruai a, an goal an venghim leh ngei tura ngaih a nih hman laiin minute 88-naah David Brooks chuan Bournemouth tan goal thun nawlh in, an si phurh a sut then ve ta thung. Hun tawp thlengin goal dang a luh belh tawh lova, City hian 2-1 hnehna changin pahnihnaah an insawh nghet deuh deuh zel.

City manager Pep Guardiola chuan EPL-ah match 150 a hmchhawn tling chiah a, vawi 111 a hnehna a chanpui tawh, a chetha chho hle.

Pahnihnaah City an insawh ngheh a, Champions League khel tura an tlin chian tawh laiin AFC Bournemouth chuan tlakhniam an hnaih deuh deuh thung. 18 na luah mek in, thlahniam thei dinhmunah an ding mek a, Pathianni zana an mikhual Southampton an hneh thei a nih chuan him beiseina lian tak an la nei zui thei thung dawn a ni.

Spurs in hma lam an pan
Ninga zana inkhel dangah Tottenham chuan khualmualah 3-1 in hnehna an chang a, hma lam an pan hret ret zel.
London derby-ah Arsenal hnehtu Tottenham hian St. James Park-ah Newcastle United an hmachhawn a, hnehna pawimawh tak an chang leh. St James Park-ah Spurs hian tha takin bul an tan a, minute 27-naah Son Heung-Min chuan hmahruaina goal a thun. Son goal thun hnu hian hun rei tak chhung goal lut a awm thei ta lo thung.

Second half-ah mualneitu lamin bul an tan tha ve ta thung a, minute 56-naah Matt Ritchie chuan goal thunin an si phurh a sut. Spurs hian an chhanglet leh thuai a, minute li hnu lekah goal an thun zui leh nghal zat. Minute 60-naah Harry Kane chuan hma an hruai nawn lehna goal a thun a, Kane vek hian minute 90-naah hma an hruaina tizauvin, an goal thumna a thun zui leh a, khualmualah hnehna pawimawh tak an chang a ni.

Pasarihnaah an inhlankai hnuin Spurs hian khingpui hautak an nei zui leh dawn a, palina ni mek Leicester City chu inrinni zan hian an hmachhawn zui leh ang. Newcastle United hian team talbuai AFC Bournemouth an hmachhawn ve leh thung ang a, thawhtan zanah an inkhel ang.

Wolves chak zo lo
Champions League khelh phak tuma hma lam pan a, chetha chho tak Wolves chuan khualmualah Burnley an hmachhawn a, hun tawp dawna penalty an chawi vangin an chak zo lova, point hnih hlutak an hloh.

Inkhel hmuhnawm takah hian Raul Jimenez chuan tha zeta tauh lutin minute 76-naah hmahruaina goal a thun. He goal hi chakpui in, United hnaih nan an hmang thei ngei dawn nia a lan laiin an chesual ta tlat thung. Hun pangngai a zo va, hun pek belh tawh a zo tep tawh; minute 90+6 -ah Matt Doherty handball vangin penalty an chawi ta tlat thung. He penalty hi Chris Wood chuan a pet goal a, mak tak maiin Wolves chak tur an dang a, an mualah point khat hlu tak an hlawhchhuah ta a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy