Internation break a zo va, khawvela tualchhung league ngaihven hlawh ber English Premier League 2025-26 khelh chhunzawm a ni leh dawn ta. 2025-26 season a Manchester derby hmasa ber chu Pathianni zanah khelh a ni dawn a, Manchester City in an elpui lian Manchester United an mi khual dawn. City in United an mikhual tur hi kar tawpa inkhel ngaihven hlawh leh boruak nei lian ber ni tura ngaih a ni.
Manager ropui Pep Guardiola enkawl Manchester City in season tharah bul an tan chhe viau a, vawi thum khel tawhin vawi hnih an tlawm tawh. Champion tura rinkai zinga mi an la hmachhawn lo chungin vawi hnih ngawt an tlawm tawh hi an tan result tha lo tak a ni. Etihad Stadium-ah ngei 0-2 in Tottenham an hneh lova, Mimualah Brighton an hneh lo tawh bawk. An hneh chhun Wolves erawh Mimualah 4-0 laiin an sawp thung. An khelh hnuhnung pahnihah an tlawm vagin insiamthat an mamawh viau a, an result chhiat lai a nih vangin Manchester United an hmachhawn tur hi an tan fiahna pawimawh a ni ngei dawn.
EPL-ah vawi li champion zawn thei hmasa ber Manchester City hian EPL 2025/26-ah point 3 hmuin 13-na an luah mek a, United hnuaiah an awm ve tehtlat. Etihad Stadium a lenglut tur Manchester United pawhin bul an tan tha hran bik lo. Vawi thum khel tawhin vawi khat an chak a, draw vawi khat neiin tlawm zawkah vawi khat an tang tawh bawk. Khelh thum atanga point li hmuin table-ah pakuana an luah mek. Team lian Arsenal lakah an tlawm tawh a, City lakah fiahna hautak an hmachhawn zui leh dawn bawk. City lakah an tlawm a nih chuan an tlahniam duai thei dawn.
City leh United te hian Manchester khuaah club lian leh ropui zawk nih an inchuh reng thin. Ropui zawk nih inchuh reng renga hmanhlel an nih vangin club inngaih tak an ni thei lo hrim hrim. Club inhal em em reng an ni a, Pathianni zan dar 9:00 atanga an khelh tan tur Manchester derby pawh hi a boruak a nung tha leh viau tura ngaih a ni.
Manchester khaw club lian pahnih zingah United an chungnungin, ropui zawk an ni rei hle. Tunhnaiah erawh club hausa thar an nih vangin City an chungnung ta viau a, United an hliahkhuh hneh chho viau. Bet zawka an tang chho ta reng hi United lamin hreawm an tiin an tuar thiam lo viau a, season kal mekah hian chungnung zawk nih ngei tumin tan an khawh nasa hle ngei ang.
Manchester derby hi zan dar 9:00 atangin khelh tan a ni dawn a, inkhel hmuhnawm tak a ni ang.
City mikhual tur United
