Civic Sense-ah tanlak ngai

Chapchar Kut kan han hmang zo a, Kut kan hmanna tualzawl (Lammual)-ah bawlhhlawh chi tin reng mai kan hnutchhiah a. Chutih laiin, Chapchar Kut thupui atan “Zo nun ze mawi- tlawmngaihna” tih kan la hmang lehnghal a, lianpuiin kan ziak kulh a. Chapchar Kut thupui kan bawhchhe nasa hle.
Thupui nei kher lo pawha khua leh tui ten ziak loh dan zawm kan bat hi a awm sa ve hrim hrim a. ‘Ti rawh’ tih emaw, ‘ti suh’ tih emaw avang ni miah lova, mi pangngai tana chhiah leh tha hriatna hmanga tihtur awm sa hi a sap tawng chuan “Civic Sense” tih a ni a, chu chu ‘social ethics’ a tih theih bawk awm e.
Mizote hi thil zirtir nuam tak, thil awmzia inkawhhmuha hrethiam thuai thei leh thuawih tak hnam kan ni tih hi chu kan pi leh pute hun lai, khaw lal rorelna hnuaia kan kun lai leh a hnu zelah pawh, kristiana kan inleh puk theih dan atang hian a hriat mai a. Entirna thil tam tak sawi tur a awm ang, traffic rules zawm chungchangah pawh, mihring heti zozai zingah chuan dan bawhchhe tawk chu sawi tur lo awm mah se, thu kan awih a, horn ri pawh hriattur a awm tawh lo va, kawngpui lehlam awl duai theia kan intlar fel thlip thlep dan pawh khualzin hnamdangten hahipa an sawi a nih tawh hi.
Inzirtira hrethiama zawm thei kan nih avang hian, inzirtirna lam hi kan uar thar a pawimawh a. Inzirtirna han tih hian, tawngkam leh lehkhaziak ringawt hi a tawk lova, a practical-a kan thawhchhuahpui a ngai. Chapchar Kut kan hmannaah pawh khan garbage bag zawn kual pawl emaw, inkar zing takin bawlhhlawh paihna chhawp emaw ni se, khatiang khan bawlhhlawh tam tak kan hnutchhiah bik lo ang. Chutianga practical-a inzirtir chuan kum hnih khat a lo awh a nih pawhin a hnu lama kan zawm that theih chuan, a hnu zela kan hlawkpui tur zawk, buaina manhla a ni dawn a ni. Aia upa zah inzirtir tura hmalak tum mek a ni pawh hi a lawmawm hle a ni.