CJP, Sonam Wangchuk leh Session

Tun dinhmunah India ram chu Cockroach Janta Party leh Sonam Wangchuk bakah Parliament Session boruakin a chiah hneh hle.
Kan hriat angin, NEET-UG paper leak avang khan June ni 6-ah Jantar Mantar-ah Cockroach Janta Party chuan protest an huaihawt a, June ni 20 atangin tiamchin awm lovin (indefinite sit-in) an chhunzawm a. India ram khawpui hrang hrangah campaign kalpui zui niin, an auhla chu – “We asked for Make in India, you gave us Leak in India” tih leh, “Dharmendra Pradhan (Education Minister) bang rawh se” tihte a ni.
Sawrkarah thil phut pathum an nei a: Union Education Minister Dharmendra Pradhan bang turin; NEET leak avanga mahni nunna late chhungte hnenah cheng vaibelchhe khat zangnadawmna pe turin; Protest-a tel te chunga FIR zawng zawng sût (man leh hremna awm lo) turin.
Hetih lai hian Sonam Wangchuk, (Education Reformer+Climate Activist+Ladakh Political Activist) chuan, “Exam system dik lo vangin zirlai an thi a, sawrkarin mawh a phur duh lo” tiin CJP protest chu thlawpin June 28 atang khan Jantar Mantar-ah a tel ve a, indefinite hunger strike a tan a. A chauh tak em avangin July 19 khan hospital-ah enkawl a ni a, hunger strike erawh a chhunzawm zel thung.
Wangchuk-a hian thil phut a nei a, chungte chu: ‘Chalo Sansad’ (parliament pan)-a tel te chunga hremna lek lo turin; zirlai thi tate chhungte hnena zangnadawmna pe turin; Parliament-ah education minister mawhphurhna leh a banna chungchang sawihona nei turin; Police-ten tharum thawh tawh lo turin. A thil phutte hi a hlawhtlin chuan hunger strike chawlhsan a intiam a ni.
Hetih lai hian, tunkar atanga Parliament fur thutkhawm neih tan pawh JCP protest boruak hian a nghawng a, Lok Sabha chu ni thum ngawt mai rorel thei lovin, nimin thleng khan a awm tawh a. Opposition lamin NEET paper leak chungchang te, July 20 ‘Chalo Sansad’ protest-a zirlaite lathi-charge leh tear gas kah chungchang sawiho an phut bakah Education Minister Dharmendra Pradhan ban an phut tel bawk a. House chhungah bengchheng an siam nasat avangin rorel thei lovin an awm a. Rajya Sabha lamah pawh Mallikarjun Kharge ten, Rule 267 anga adjournment motion hmanga sawiho an phut tlat a, chumi hma chuan Education Minister Pradhan bang phawt rawh se, an ti ve bawk a.
Heng zawng zawng lo chhuahna (a kaikuang) hi ‘NEET paper leak’ vang a tih theih rualin, NEET paper leak protest huaihawttu Cockroach Janta Party hi awm lo ta se, hetiang tak hian boruak a sosang ang em tih ngaihtuah theih tak a ni. Engtia Cockroach Janta Party chu lo piang ta nge kan tih chuan, May ni 15, 2026-a Supreme Court-a thubuai ngaihtuah laia Chief Justice of India Surya Kant thusawi pakhat vang a ni a; chuta a thusawi chu: “|halai thenkhat hi chu Chukchu ang an ni a, hna hmu lo leh eizawnna mumal nei lo, thenkhat chu media-ah an lut a, thenkhat chu social media, RTI activist leh activist dang te pawh an ni. Mi zawng zawng an bei tan ta a,” tiin. He a thusawi hi CJI hian a hnu lamah chuan ‘degree lem hmanga hnaa luh tumte’ chauh a tihna niin a sawi a, mi thenkhatin a thusawi an quote sual niin a sawi bawk.
A tuk maiah Abhijeet Dipke, kum 30-a upa, political communications strategist leh AAP volunteer hlui, Boston University-a public relations-a Master zir mek chuan, X-ah Google Form a post a, mi te chu “Cockroach Janta Party” ah in-register turin a sawm a. “Chukchu” tih chu in-unauna chhinchhiahna atan an hmang hlauh a! CJP hi party tak register ni lovin, thalaite kaihhruai fiamthu/tihelna anga siam political movement a ni a, rorel lai party Bharatiya Janata Party deuhsawhna lam hawi deuh a nih hmel a, ‘thatchhia leh hna hmu lote aw” tiin an vuah a ni.
Tun mai July ni 22 khan Supreme Court-a Lawyer pakhat chuan Chief Justice of India Surya Kant hmaah dilna a theh lut a, chu chu July ni 20-a ‘Chalo Sansad’ a zirlaiten police kut an tawrh chungchang, Court-in suo-motu hmanga ngaihtuah tura a ngenna a ni. Hemi chungchangah hian CJI hian “Don’t Waste our time, and don’t waste your time..” tiin a chhang a. Lawyer hian zirlaite sawisakna video a neih thu a hrilh pawhin CJI hian, “We are not interested in video, we don’t have time to watch videos” tiin a chhang leh hmiah mai a. A hma daiha Cockroach chungchanga a thusawi, ‘an quote sual’ anga a lo sawi tawh pawh kha, tuna a thusawi duh dan atang hi chuan ‘an lo quote sual lo a ni ang a’ tih ve theih tak a ni.
Khai le, Mizoram ve thung: Tun hnai kum hnih/thum chhung vel hian MPSC result tihsual avangin correction notification hmuh tur a awm chho ta zut mai a, zirlaiten ngaihngam taka innghahna atana an hman tur ber a phuailuai viau thin a nih chuan, cockroach ang chi hi an lo piang ve mai ang tih te pawh hlauhawm thei tak a ni. Tuna thil thleng mek atang hian zir chhuah tur tam tak kan nei ngeiin a rinawm.