Site icon The Aizawl Post

CM fapa-te restaurant-in zu an zawrh loh thu puang

Tunhnaia Assembly House-a chief minister fapa-te restaurant ah zu chi hrang hrang zuar tel ni anga sawichhuah chu thudik lo a ni tih he restaurant neitute chuan an sawi.
Muanna Venga kudam piaha restaurant – Johnson Garden neitu nia sawi mi pathum – Mannfred Z. John, Nicholas Z. John leh Ramthansiama te chuan an hminga thuchhuah siamin, 2023 February 23 khan Assembly House-ah MLA Pu Zodintluanga’n an restaurant chu thu dikloa puh hmingchhiat tumin, whisky, wine leh rum duhtawka lam tur awm thin angin a puh tih an sawi.
‘Hetianga thudik lo leh belhchian dawl lo, finfiahna sawi tur engmah nei loa MLA-in Assembly House-a min puh hi kan hrethiam loin, kan la na hle a. Mizo thalai entrepreneurs, mahni kutkawiha eizawnna daptute min fuih zawng ni loa, thudiklo hmanga kan rilru ti na leh tihnual zawnga kan ram hruaitu atana thlan a tawngchhuak mai hi Mizo thalaite tan a pawi takzet a ni,’ thuchhuah chuan a ti.
Johnson Garden-ah hian engtik lai mahin zu an zuar ngai loa, sawrkarin phalna neite tana zawrh a phal, Mizoram tharchhuah grape atanga wine siam takngial pawh an zuar ngai lo tih sawiin, ‘Finfiahna nei si loa hetianga min puh mai hi kan sumdawnna min tihchhiatsak tumna a nih bakah Assembly House leh member zahawm tak takte zah lohna lian tak, mipui hmuhsitna tling a niin kan hria a. Zu lam chi reng reng kan zuar lo a ni,’ an ti.

Exit mobile version