CM hi sawisel thiang lo ah a inngai niin a lang – Lalnunmawia

CM hi sawisel thiang lo
ah a inngai niin a lang
– Lalnunmawia
Chief minister-in an duh angin an rel tur thu leh an rorel dan lo sawi ve lo tura a ti mai chu democracy kalh, mipui dikna chanvo a ni tih Congress hruaitu Lalnunmawia Chuaungo chuan a sawi a. CM chu sawisel thiang lo angah a inngai nia a lan thu a sawi.
Zirtawpnia Congress Bhavan-a inkhawmah MPCC senior vice president Lalnunmawia Chuaungo chuan, ZPM office-a chief minister-in thu a sawinaah, an duh angin an rel ang, lo sawi lo sawi ve s’u, tiin NGO, civil society leh party dang a ti tih a sawi a. Democracy ram kan nih angin, sawrkar kal dik lohna leh tih dik loh sawisel chu mipui dikna a ni a, mipuiin an sawisel thiang a, sawisel lo tura intih chu a kalphung loa, an dikna inrahbeh sakna a ni tih a sawi.
“Restricted tender hmanga hna inpek, contractor ni lo contract hna inpekte hi em ni kan duh angin ro kan rel ang, lo sawi lo sawi ve suh u an tih? NGO, civil society, opposition party leh mimal thahnemngaiten thil dik lo an hmuh leh an hriatte sawi loin an awm thei loa, kan CM hian chu chu a ngaithei loa, sawisel thiang lo angah a inngai niin a lang,” a ti.
ZPM chu an intiamna avanga mipuiin thlangtling an ni a. Sawrkar kal tawhte sawiselin, an tih ve loh tur thu an sawi a. An MLA candidate-te pawhin thutiam la in, chhung leh khat leh mahni inhaivurna laka inthiarfihlim an intiam vanga thlang an ni tih Lalnunmawia Chuaungo chuan a sawi. An intiamna langsar ber leh thingtlangmiten an thlan chhan ber chu ‘sawhthing’ a ni thung tih a sawi.
“A lei lam buaipui turin Agriculture Marketing Board an din a, ZPM mi leh sa hlir an ruat. Sawhthing chingtuten an hralh theih zat an dawngsawng thei loa, a phuai luaiin engzat nge an lei leh hralh pawh a chiang ta lo. Hei hi mipuiah sawifiah turin kan phut a ni,” a ti.
Mizoram puma sawhthing thar beisei zat, Assembly zawhna Horticulture minister chhan danin, quintal 14,83,253.62 a ni a. June 27 khan Agriculture Marketing Board chairman Dr KC Malsawmzauva sawi danin quintal 2,33,604 an lei a, a hnu lam, ruahtui tlak hnu June atanga August-ah amah vekin quintal 3,47,3871 an lei tawh tih a sawi leh thu a sawi chhawng.
“Ruahtui tlak tam hnu hian nitin quintal 3448 an lei anga chhut a ni a, hei hi thil theih niin a lang loa, thil felhlel a awm ngeiin a lang,” MPCC hruaitu hian a ti.