Sainik Welfare & Settlement department chuan nimin khan Loch House (Gajraj Hall), Aizawlah 10th Armed Forces Veteran Day cum Ex- Services Reunion of Mizoram an hmang a; he hun hi chief minister Lalduhoma’n khuallian niin a hmanpui a, K. Sapdanga, home minister chu khualzahawm a ni.
Chief Minister chuan, India ram zalenna sualnaah te, Indopui pahnihnaa India ram venhimnaah te, zalenna kan hmuh hnua indona hrang hrangah te Mizoten kan thawh hlawk ve hle tih a sawi a. Mizo thalai India sipaia tangte hi an awmna hmun apiangah fak an hlawh thin a, kan hmingthanpui hle a. Mi tam takin indonaah nunna an chan a, mi tam tak dam takin an rawn pension a. Vawiinah kan ram venhim nana vanglai hun tha hmangral tawhte bula Armed Forces Veteran Day ka rawn tel hi nuam ka ti hle a ni. Ram tana in inpeknateah lawmthu ka sawi a, an nunna hlantu zawng zawngte zahna chibai ka buk a ni, chief minister chuan a ti.
Chief minister tarlan danin, financial year kaltaah khan kum 65 chung lam, sipai bang pension la ve lote tan sorkar chuan Penury Grant Rs. 49.44 lakh a dil chhuak a, sipai bang fate scholarship tur Rs. 47.4 lakh dil chhuah a ni a, sipai nupui hmeithaite inzirna atan Rs. 2.5 lakh leh sipai bang fanute pasal neih tanpui nan Rs. 4 lakh pek chhuah a ni.
Tun financial year kal mekah hian sipai huaisen chawimawina dawngte lawmpui nan Rs. 16 lakh pek chhuah tawh a ni a, pek tur an la awm zel tura ngaih a ni. Ex- Servicemen Contributory Health Scheme hnuaiah a thlawna inenkawlna hmun atan ZMC & H leh Zemabawk Cancer Hospital chu dah thar a ni a, sorkar hna laknaah 5% reservation siamsak mek a ni. Tunah hian Mizoramah Ex-Servicemen 6170 leh hmeithai (dependent) mi 2483 an awm a. Central sorkar atanga hamthatna an dawn hi kum khatah Rs. 180 crore vel a tling thin a ni.
Chief minister hian lawmman chi hrang hrang a sem nghal a. A dawngtu zingah India ram sipai huaisen chawimawina sang ber pahnihna Kirti Chakra nikuma dawngtu Captain Lalrinawma Sailo a tel a. Ani hi Mizo zinga Kirti Chakra dawng thei pahnihna niin Mizoram sorkar chuan lawmpuina cheng nuai sawm a pe a ni.
K. Sapdanga, home minister pawhin thusawiin, kan sipaite hian nunna aia ram himna dah chungnung zawkin an vanglai leh an that lai nite an hmang ral a. A then hlim taka an rawn kir laiin a thenin an nunna an hlan a. Ram tana an inpekna hi a hlu kan ti a, kan zahin kan chawimawi a ni, a ti bawk.
Armed Forces Veteran Day hi India ram pumah kum 2017 atang khan hman tan niin ni 14 Jan-ah hman thin a ni a. He ni hi First Commander-in-Chief of the Armed Forces, Field Marshal KM Cariappa OBE, kum 1953-a pension-a a chhuah ni a ni. Kumin Armed Forces Veteran Day hi a vawi sawmna niin, Mizoramah chuan kumin hi an vawi thum hmanna a ni.
CM-in 10th Armed Forces Veteran Day hmanpui India ram venhimnaah Mizoten kan thawh hlawk: Duhoma
