CM-in Aizawl Ven Buk a tlawh
Chief minister Lalduhoma leh UD&PA minister K Sapdanga chuan Aizawl Ven Buk (Integrated Command & Control Centre under Smart City) Treasury Square ami chu Zirtawpni khan an tlawh.
Aizawl hmunhma lun zual lai tuam vek thei CCTV network, record fiah leh changkang tak kan nei ve ta chu lawmawm a tih thu chief minister hian a sawi a. A enkawlna lam hautak deuh mah se, ram leh khawtlang venhim kawngah a tangkai a. Duhthusamah chuan Aizawl chhung leh a chhehvel hnaivai, chhiatrupna thlen palh theihna hmun huam thei se a tangkai zual dawn tih a sawi.
“He hmun tangkai lehzuala kan hman theihnan thawhhona tha in neih a tul dawn niin ka hria a. He hmun hmang tangkai thei department-te nen tha takin thawk tlang ula, kan tangkaipui lehzual ang,” tiin thawktute a chah.
UD&PA minister chuan he control room zarah hian misual, rukru leh dawtsawi ching thlengin an chhuichhuak thin. Tunhnaia mi pakhatin, “Raltlan, silai kengten kut min thlak,” ti pawh kha thil dik tak chu he hmun atanga chhuichhuah a ni tih a sawi.
Aizawl Smart City Ltd chief executive officer CC Lalchhuangkima’n an hnathawh dan a sawifiah a. Aizawl Ven Buk (ICCC) hi 2023 April 1 khan Union Home minister Amit Shah chuan a hawng a, cheng vaibelchhe 87.18 senga din a ni. A enkawlna atan thlatin cheng nuai 7.8 vel mamawh a ni. Mipui, a hmang tangkai duh tan Rs.100 chawia hman theih a ni.
Toyota company chuan an CSR atangin Aizawl Traffic Management tihchangtlunna tura hmanrua, CCTV lam chi an thawh belh nual a. Chu’ng bungrua hmang chuan ICCC network hi tihlen tum a ni.
CM-in Aizawl Ven Buk a tlawh
