New Delhi-a sawrkar thil pawimawh tia kal chief minister Lalduhoma chuan sawrkar laipuia minister leh hotu dang thenkhat a kawm kual. External Affairs minister Dr S Jaishankar chu a office-ah hmu in, an pahnihin an inkawmfal a. Mizoram leh a chhehvel politics inlumlet dan an sawi dun. Chief minister hi hemi thuah hian mawhphurhna lian tak pek mek a ni tih sawrkar thuchhuah chuan a sawi.
Union Home secretary Ajay Kumar Bhalla a pisa-ah a hmu a. Home secretary hian Cyclone Remal avanga Mizoramin chhiatna hrang hrang a tawrha chhawmdawlna tur cheng vaibelchhe 21.64 chu State Disaster Response Fund hnuaiah pekchhuah a nih tawh thu leh 2nd installment pek thuai a nih tur thu a lo hrilh. Mizoramin Security Related Expenditure (SRE) hnuaia sum a dawn ve ngai loh chungchang chu CM hian a sawi a. Home secretary hian bawhzui a lo intiam a ni. Raltlan enkawlna tura mamawh hrang hrang leh chhawmdawlna pek tur a thlen chu an bawhzui tur thu a lo hrilh bawk.
National Security adviser Ajit Doval nen a chenna inah an inkawm a. Indian Army hnuaia Mizo Scout battalion din chungchang a sawipui bakah Myanmar ram buai leh hmalak zel dan tur an sawi dun.
Minister of HealthJP Nadda a office ah a hmu a. Minister hian Zoram Medical College tana special package dilna thehluh tawh atanga 1st installment cheng vaibelchhe 170 pek thuai a nih tur thu a lo hrilh. ZMC tihchangtlun zel dan tur leh health sector-a Mizoram hmasawn dan tur kawng hrang hrang an sawi bawk.
DoNER leh Comminications minister Jyotiraditya Scindia nen a office-a an inkawmnaah a pa, Madhavrao Scindia chu central minister a nih lai velin Pu Lalduhoma nen hian thian tha tak an ni a. A pa thian hlui a nih angin a lo ngaina hle niin sawrkar thuchhuah chuan a sawi.
DoNER minister hian Mizoramin North Eastern Council kaltlanga sum a hmuh thin chu tihpun a lo tiam a. NESIDS OTRI chu Mizoram mila guideline her danglam a remti bawk. Externally aided project hnuaia Mizoramin sum a hmuh thin leh hemi kawnga harsatna lo enfel a intiam a. Forest clearance hmuh theih loh avanga project pending thin leh NEC thuneihna tlahniam zel chu veiawm an tih thu an sawi dun a ni.
Parliamentary Affairs and Minority Affairs minister Kiren Rijiju a hmuhnaah Mizoram mamawh hrang hrang a thlen a. PMJVK hnuaia project 65 chu a theih anga tihhlawhtlinsak ngei a lo tiam. Project pending mek leh project thar chungchang an sawidun bawk. Chief minister hian Kiren Rijiju chu Parliamentary Affairs minister a nihna angin Mizoram atanga Lok Sabha MP awmchhun Richard Vanlalhmangaiha chu NDA ni lo, INDIA pawh ni lo tana thutna tur ngaihtuahsak turin a ngen a. Mizoram MP hi House chhunga thusawina hun tam thei ang ber pe turin a ngensak bawk. He ngenna hi Union minister hian bawhzui sak a tiam a ni.
Minister of state for External Affairs leh Textiles Pabitra Margherita pawh kawm a. Mizoram hmasawnna tur a sawipui a ni.
CM-in central hotu ho a kawm kual ZMC tan special packaage pek tum
