Daily Newspaper

CM-in cheng Vbch 118 senga infiamna ruhrel dinna tur lungphum phum

23

Project pasarih hnuaia cheng vaibelchhe 118 chuang senga Mamit district chhunga infiamna ruhrel dinna tur lungphum chu nimin khan chief minister Zoramthanga’n a phum.

Chief minister-in lungphum a phumte hi – Kawrthah-ah Residential Sports School (project cost Rs. 3286.34 lakhs) leh Smart Classroom (Rs. 17.54 lakhs) atan; Tuidamah Astroturf Football ground (Rs. 532.50 lakhs) phah tur; Mamit-ah Residential Sports School (Rs.3286.34 Lakhs), District Sports Complex (Rs. 4496.48 Lakhs), Community Service Centre (Sadvhav Mandab) (Rs.236.00 Lakhs) leh Smart Classroom unit hnih (Rs. 35.08 Lakhs) te a ni.

Heng Mamit district tana hmalakna tharte hi Sports & Youth Services Department kaltlanga Pradhan Mantri Jan Vikas Karyakram (PMJVK) hnuaia sum hmuh hmanga thawh tur a ni.

Chief minister Zoramthanga chuan thalaite hmasawnna tur, an hma hun a nasa taka remchang siamsaktu tur chu lawmawm a tih thu leh, tangkai thei ang bera hman an nih a beisei thu a sawi a. Tualchhung mi mai ni lo district pum tana ro tling leh chhenfawm tur thil a nih avangin tha taka sak a puitlin a nih theih nan thawktute chu lo enpui a, lo thawhpui turin khaw mipuite a sawm nghal a ni.

CM Zoramthanga chuan zirna lamah te, infiamna lamah leh kawng dang danga thalaiten hma an sawn theihna tur zawnsak chu sawrkarin a ngai pawimawh tih sawiin, tunlai khawvelah chuan a remhria apiang tan eizawnna kawng tha tak tak a inhawn zel thu sawiin, hlawhtling tur erawh chuan tawrhchhel leh taimak a pawimawh a ni, a ti bawk.

Sports and Youth Services Minister Robert Romawia Royte pawhin thu sawiin, Mizoram khawthlangah infiamna ruhrel tha a awm ve lo chungin sports discipline hrang hrangah Zoram leh India huap pawha lang pha thalai tam tak an chhuah tawh thu a sawi a. Hna tanna tur lungphum phum tak project-te chu thawh zawh a nih hunah Mizo hnam tana chhuanawm thalai tam tak khawthlang atanga an lo chhuah a rin thu a sawi.

Sports minister chuan sorkarin sports leh kawng danga thalaite hmasawnna a ngaihpawimawh avangin Zorama la awm ngai lo Mizoram Sports Policy 2019 a siam te, sports chu Industry Status pek a nih tak thu sawiin, hei hi hmasawnna intanna leh Central Sorkar pawhin phur taka hmasawnna sum min pek duh chhan a ni, a ti bawk.

He hunah hian Mizorama Sports Association hrang hrang inzawmkhawm United Sports Association of Mizoram President leh Mamit District Sport committee aiawh te pawhin Sports infrastructure tha Mizoramin a neih thar dawn avangin lawmthu an sawi a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy