Mizoram sawrkar hnuaia Khamrang leh Selesih inkar kawng laih mekah restricted tender hmangin chief minister-in a duhsak zawng mi 6 hnena hna a pek bakah an kawng lai leivung hian environment a tichhe nasa hle tih ZPM Thalai chuan an sawi.
Khamrang to Dilsei to Selesih leh Sirvakawn to Selesih by pass road laih mekah kawng laihna atan hian Mizoram sawrkarin cheng nuai 5924.86 chu NABARD hnuaia Rural Infrastructure Development Fund atangin a pung awma pukin, nuai 658.32 chu state sawrkarin a thawh ve tur a ni a. He kawng laitu tur zawn hna hi restricted tender hmanga chhuah niin, bialtu MLA, chief minister leh PWD minister ni bawk Pu Zoramthanga vua leh vang mi 6 hnenah duhsak taka pek bik an ni tih ZPM Thalai chuan an sawi.
Inrinnia a hmuna ZPM Thalai Hqrs hruaituten an tlawhnaah, hetianga chhungkaw induhsakna hleihluak taka chief minister-in a pek kawng laih hna thawktu contractor-te hian an leivungte chu mumal taka a paihna hmun siama paih loin, kawngthlang lamah annawrthla a, kawrte hnawhin thing leh mau leh nungcha tam tak an ti chereu tih an sawi.
‘He kawng laihah hian a thawktute hian environmental clearance engmah an nei loa, environmental assessment tih a ni bawk hek lo. Mizoram mipuiin kan ba intawm tur cheng nuai tam tak puk a nihnaah kan environment tichhe zawnga hna thawh a ni hi kan ngai thutak hle a, cheng nuai tamtak a pung awma puk turah a thawktute pawh mipui hriat tlan niloa mitute emaw duhsak bîk an ni thin hi a thianghlim lo kan ti a, MNF sawrkarin mipui a huap zawh loh zia a ti langchiang hle-ah kan ngai,’ ZPM Thalai chuan an ti.
Kawng hi March 2024-a zawh hman tura ruahman a nih laiin, km.28 laih turah km.10 erh awrh chauh laih niin, RCC-a chhun leh vek tur a ni tih an sawi a. Hun tiam chhung ngeiin chief minister duhsak takte hian an zo hman ang em, tih chu zawhna a ni tih an sawi.
MNF sawrkar chu mipui leh a ram chhunga cheng Pathian in min pek leilung hausakna leh nungchate enkawl kawngah rintawk an har ta hle-ah a ngai tih ZPM Thalai hian sawiin, ‘Mi tlemte hlawkna tura ram leilung hausakna leh mipui dahkham kan ni thin hi a pawi hle a ni,’ a ti.
CM-in duhsak zawngte hna pe Environment tichhe zawngin che
