Daily Newspaper

CM-in FOCUS hnuaia hmalakna sawipui

14

Chief minister Zoramthanga chuan Thawhtanni khan FOCUS (Fostering Climate Resilient Upland Farming System in the North East) hruaitute kawmin an hmalakna leh kal zel dan tur an sawi ho.

Chief minister chuan ei leh barah state a intodelh chu an ngaihpawimawh hmasak ber tur a ni tih rilrua pu reng chungin, theihtawp chhuah a, ram tan thahnemngai taka hma la zel turin FOCUS member-te chu a chah.

FOCUS hi United Nations agency pakhat – International Fund for Agricultural Development (IFAD) hnuaia project niin, sik leh sa inthlak nasa ‘global warming’ leh ‘climate change’ khawvelin a tawn mek hrula hmasawnna hna thawhna tura ruahman a ni. Sik leh sa inthlak danglam nasain kan eizawnna ber thlai thar leh tlangram lo neih a tihbuai chhoh mekah loneitute kawng kawhhmuh a, tunlai thiamna hmanga puih leh kaihhruaina pe turin FOCUS hi din a ni.

Mizoramah district pali – Champhai, Kolasib, Serchhip leh Mamit hnuaia khaw 272 a huam.

FOCUS project tum ber chu, thingtlang lo neiha eizawng chhungkaw 64500 ten hlawk zawka thlai an tharchhuah theihna tura tihhmasawn leh kumtin lo hal avanga sik leh sa inthlak danglam nasa lutuk tihziaawm a ni a. Zawi zawia tlangram lo vah leh lo hal kalsan a, sik leh sa mila thlai kumhlun hmanga loneitute sum dehchhuah tih pun a tum a ni.

IFAD atangin FOCUS Project atan hian loan US dollar maktaduai 35.30 ruahman a ni a. Agriculture, Horticulture, Animal Husbandry & Veterinary Department leh Land Resources, Soil & Water Conservation Department-te a huam a. Agriculture Department hi nodal department a ni.

(THE AIZAWL POST – Tualchhung)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy