Chief minister Lalduhoma chuan nimin khan Thenzawla Mizoram Handloom Export Facilitation Hub-ah ‘IoT Device Deployment’ a hawng a. Puantahtuten an puantahah kan hnam culture leh nihphung an tah tel a ni, a ti. IoT (Internet of Things) Device hi puan leituten internet hmanga an puan lei chanchin awlsam taka an hriat theihna tura duan a ni a. Puantaha QR code chu scan-in, a tahtute, a tahna hmun leh thil pawimawh dang awlsam takin a hmuh theih a ni.
He project sum hi North Eastern Council, MDoNER, Government of India atanga sanctioned niin, Project thawktute hi MDoNER Corporation, North East Handicrafts and Handloom Corporation, Guwahati an ni.
Chief minister chuan Thenzawl leh a chhehvela puantahtute hian puantahin ei an zawng a ni satliah lova, an puantahah hian kan culture leh kan nihphung an tah tel a, kan hnam tih phung anga puan an tahnaah technology tha zawk a rawn inrawlh lut thei hi a ropui a ni, a ti a. Kan thalaite fashion designing-ah an sang a, lehkhathiam thalai rualte nen tang hovin export lam tih dan te zir ni se, tiin a sawi bawk.
Chief minister chuan mi tam tak eizawnna Mizoram Handloom hian hma a sawn zel a ngai a, sorkar lama thawktute pawhin nasa leh zuala ke kan pen a ngai, a ti a. Kalphung tharah project kawng bo awm lovin, a hmang tangkai turte hnen thleng ngei zelin hna kan thawk tur a ni, a ti. ZOHANDCO pawh tihchak zel a tul thu sawiin, NEHHDC leh agency dang kan tana tangkai turte kuangkuah chungin kan kal zel dawn a ni, a ti bawk.
F. Rodingliana, Industries minister pawhin thu sawiin, Mizoram Industrial Policy hnuaia subsidy scheme tha tak takte chu hmang tangkai turin industry neitute a sawm a. Mizote hi hnam mawl kan nih lohzia chu puan nalh tak tak tah thiam kan nihna hian a tifiah a ni, a ti bawk.
Neeraj Kumar, Manager, NEHHDC chuan an device kalpui chanchin a sawifiah a; khawvel hmaa India hmarchhak hnamte nunphung leh zia venhimna leh phochhuahna a ni, a ti. Sum leh pai hmuhna hnara hmang chungin heng kan hnam zia leh tih dan te, kan incheina te zau zawka tarlanna a ni a, internet kal tlanga zawrh chhuahna remchang a siam bawk, a ti a. Handloom & handicraft lamah Mizoram chuan hmabak eng tak a nei a, hei hi nasa zawka chawikan zel kan duh a ni, a ti bawk.
CM-in IoT Device Deployment a hawng Puan tahtuten kan culture leh nihphung tah tel: CM
