CM-in LADC chung- changah thudik lo sawi
– LADC chairman
Chief minister Lalduhoma’n Lai Autonomous District Council chungchangah thudik lo hulhual a sawi tih LADC chairman C Lalmuanthanga chuan a sawi.
LADC chairman hian, tunhnaia Siaha-a chief minister-in Autonomous District Council chungchang leh, a bikin Lai ADC chungchang a sawi danah thudik lo a awm tih a sawi a. LADC-in sum a dawn zawng zawng 100% thawktute hlawh atan a hmang fai vek, nia a sawi leh, kudam pakhat enkawl turin Group ‘D’ panga dah nia a sawi chu thudik lo hulhual a ni tih a sawi. “LADC hian 100% sum a hmuh hi 100% thawktu hlawh atan a hmang lo. Kum 10 chhung atana hlawha senral hi data fel tak kan nei a, a duh chuan kan pe thei. Tunah hian 93.09% hlawh atan kan hmang mek. LADC hian kudam enkawl lai a nei lo hrim hrim,” a ti.
Mizoram State Finance Commission-in sum a ruahman sak bak inpek belh theih loh nia chief minister-in a sawi chungchangah, a pek belh duh leh duh loh chu finance changtu a nih angin CM thu a ni tih a sawi. “Congress sawrkar lai khan 1st Mizoram Finance Commission hman tan a ni a, zero atanga hman tan a ni. 1st MFC-ah khan earmarked sa a nih reng laiin, LADC sum indaihlohna kha khati hunlaia sawrkar khan RE nuai 1999.85 salary sector-ah 2018- 2019 khan min pe a, a kum leh financial year 2019- 2020 ah pawh nuai 596.89 salary sector atan bawk RE min pe,” a ti.
Plan leh non- plan anga sum an dawn hun chhung, kum 7 chhungin state sawrkar atangin development works, non- plan sector chu figure ngairengin, pung miah loin state sawrkar hian a enkawl niin LADC chairman hian a sawi a. Salary sector erawh loh theih loh – annual increment, promotion, pay upgradation, DA pung adt. vangin kumtin a pung thung tih a sawi.
“Chutiang vang chuan salary sector hi a pung lo thei lo. 2024 financial year-ah keimahni ruahmanna in non- salary bikah kum 7 chhung nuai 1233.00 ni thin chu nuai 1300.00 a tihpun a ni zawk a. Heng zawng zawngah hian development works atana sum dah sawrkar hnathawk hlawh atana in hmang, min ti hi thudik lo hulhual a ni,” a ti.
Anti-defection law chu LADC chuan a duh a, a hmang reng thin a. 10th Schedule-ah chauh a hman theih avangin 6th Schedule-a awmten an hmang thei lo a. He dan hi Parliament-in Sixth Schedule a siamthat hma loh chuan state sawrkar tih theih a ni lo tih C Lalmuanthanga hian a sawi. “Constitution (125th Amendment) Bill 2019-ah ADC-ten defection avanga member-te ban theihna dan siam theihna hi dah a ni a, tunah pass a la ni lo mai chauh a ni. He dan min paihsak tirtu chu tuna ZPM-a awm mek ex-MDC ni ta te leh MDC nilai mekte hi an ni a, mahni party mawng inhlimna mai a ni. Anmahni an ban mai hlauhthawn avangin LADC innghahna leh rorelna ngelnghehna atan Anti-defection Law hi an lo khing a ni,” a ti.
CM-in LADC chung- changah thudik lo sawi – LADC chairman
