Site icon The Aizawl Post

CM-in NABARD seminar hmanpui

NABARD (National Bank for Agriculture and Rural Development) chuan Ningani khan Aizawlah State Credit Seminar a buatsaih.
He hun hmanpuitu chief minister Zoramthanga chuan State Focus paper – 2023- 2024 a tlangzarh a. NABARD-in state hmasawnna atana hma a lakte chu lawmawm a tih thu sawiin, state-in chak zawk leh rualkhai taka hma a sawn theihna’n bank an pawimawh a. State dang khaikhin chuan Mizoram chu la naupang tak, hmasawnna kawngah pawh puihna tam tak mamawh a ni tih a sawi.

State dangin leilung hausakna an neih ang neih ve vek lo mah se, Mizoram chuan theihna haichhuah tur tam tak a nei thung, tiin, “Chu potential haichhuak tur chuan kan ngaihtuahna her danglam a tul a. Hmalakna tam zawk chu a lian emaw a te emaw bultanna tur sum lu mamawh a nih thin avangin bank-ten mi tamzawk hnenah loan an pekchhuah zel a, financial literacy inzirtir zel te, state chhung hmun hrang hrangah zau zawka an inzarpharh zel te a pawimawh a ni,” a ti.

Chief secretary Dr Renu Sharma chuan NABARD-in chu state economy hmasawnna a thawhah sawrkar tan thawhpui tha tak a nih dan sawiin, agriculture leh horticulture bakah lei nghenga eizawnnain hma a sawn theihna’na an hmalakna fakawm a tih thu te, awlsam zawka loan pekchhuah a nih theihna’n leh credit system tha zawk a awm theihna’n hmasawnna tur tam tak a awm thu te a sawi bawk.

Seminar-ah hian NABARD Mizoram RO general manager KVSSLV Prasada Rao chuan inlawmna thu sawiin, Mizoram Rural Bank chairman V Jaya Chandra chuan thu a sawi bawk a. Tribal Development Fund, Rural Haat leh SHJ/JLG sanction letter pekchhuah a ni. NABARD DGM Thangchinkhup leh AM Rahul Kumbang chuan State Focus paper an present a ni.

Exit mobile version