Daily Newspaper

CM-in nuai 3,443 man sports ruhrel dinna tur lungphum phum

8

Aizawl, December 15 : Chief minister Zoramthanga chuan nimin khan West Phailengah sports hmasawnna ruhrel cheng nuai 3,443 chuang man dinna tur lungphum a phum a; chawhnu lamah Reiek-a Public Health Centre building thar sakna tur leh Reiek chawmna tur Water Supply Scheme (feeding leh pumping) siamna tur lungphum a phum bawk.

West Phailenga sports ruhrel din tur te hi Residential Sports School, Community Centre leh Smart Classroom niin, Sports & Youth Services Department kaltlanga Ministry of Minority Affairs hnuaia Pradhan Mantri Jan Vikas Karyakram (PMJVK) atanga sum hmuh hmanga hmalakna a ni.

Chief minister chuan Mizoramin kawng hrang hrangah hmasawn theihna a neih thu leh, a chhunga cheng mihring ten kan ngaihtuahna kan her rem thiam chuan kan thenawm state te tana entawntlak hmasawnna kawng hrang hrangah kan lantir theih thu a sawi a. Ei leh ina intodelh mai bakah hralhchhuah tur te, mihring thluak themthiamna hmang tangkaia eizawnna hrang hrang dapchhuah te, infiamna khawvelah lah ramchhung leh ram pawn pawh a lang pha kan neiin, kan la nei chho zel ang, tiin a sawi a. Sawrkarin kawng theihtawp chhuahin hma a la zel ang a, taimakna leh tumruhnain a zui chuan hlawhtlinna a awm ngei dawn tiin, mahni zawn theuha kan tih tur hlenchhuah tum turin mipui a sawm nghal a ni.

Sports & Youth Services Minister Robert Romawia Royte chuan West Phaileng khua mai bakah chhehvel khuate pawhin tangkai taka an chhawr ngei a beisei thu a sawi a. Heng project-te hi a nihna tur ang taka zawhfel a nih theih nan tualchhung mipuite pawhin lo enpui a, a sak hna thawktute lo thawhpui turin a chah a ni.

Lungphum phum tak PMJVK project pathumte hi cheng nuai 3,286.34 man Residential Sports School te, cheng nuai 140 man Community Centre (Sadbhav Mandap) leh cheng nuai 17.54 man Smart Classroom te a ni.

Reieka Public Health Centre building thar sakna tur leh Reiek chawmna tur Water Supply Scheme lungphum a phumnaah chief minister chuan Reiek khaw tan tui thianghlim lakna tur thar a awm dawn ta chu a lawmpui thu a sawi a. Zoram hmasawn theihna Pathianin a dah tam tak hmu thiam a, remhriatna nei a, haichhuak thiam apiangin malsawmna an chan tur thu a sawi a. Ram hmasawnna atan Zoram mipuite theihtawp chhuahpuiah a sawm a ni.

Reiek PHC sak tur hi project cost chu Rs. 2,89,53,700 niin, feet 7,242.6 bial a zau, chhawng hnih a sak tur a ni a. Reiek Feeding & Pumping Water Supply Scheme (Gravity Flow & Pumping System of Water Supply Scheme) hi NABARD hnuaia Rs. 12,96,63,000 hmanna tur, mi 3,519 chawm tur niin, Dihmunzawl atangin tui la in, Ailawngah Pump House dah a, tuizem lian (reservoir) chu Reiek Tlang a dah tur a ni.

Read More>> Full>> Epaper Subscribe Now

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy