Chief minister atana lakluh a nih zawhin Lalduhoma chuan Zirtawpni khan Sakawrtuichhuna Tawngtai Bethel Camping Centre (TBCC) a tlawh nghal a, he Camping Centre enkawltute leh damlo enkawl lai mi 860 ten inkhawm an lo buatsaih sak.
Chief minister chuan an sawrkar huna tih tur pawimawh an duan zinga pakhat, ‘ram rorelnaah Pathian ram lo thleng rawh se’ tih a nih angin, Pathian lal ram lo thleng tur dipdaltu lian tak pakhat chu ruihhlo a ni tih a sawi a. Thalai leh pavalai thihna chu ramin a tuar nasa em em a, a chhan lian ber chu zu leh ruihhlo a ni tih a sawi.
“Chief minister atana lakluh ka nih hnua mahni in pawh tlawh loa he hmun ka tlawh chhan chu, he Centre leh a anpui kan rama inenkawlnate kan ngaipawimawh vang a ni a, zu leh ruihhlo laka kan thalaite humhim an nih theih nan sawrkar chuan theihtawp a chhuah dawn a, ruahmanna tha tak a siam thuai dawn,” a ti.
Home, jail leh Centre hrang hrang chu sual laka fihlim nan chauha hmang loa, kan fihlim tawh hnua eizawnna leh thiamna hlu tak tak hmuh theihna hmun atana buatsaih a pawimawh tih Lalduhoma hian a sawi a. Ruihhlo lakah fihlim mah ila, engmah thawh tur leh tih tur neih zui si loh chuan ruihhloah bawk tluk leh a awl avangin, Centre-a thawktute leh sawrkar tang ho zelin, mamawh leh tul awmte pawh inhrilh hreh lo a, hma lam pan zel turin a sawm tih a sawi.
Damlo awm mekte chu mi ropui nih tum turin a beisei lo a, mi pangngai, mite tih ang ti a, mite nih ang ni ve thei, mite nun dan pangngai anga nung ve thei tura a beisei tlat thu a hrilh a. Krismas leh kumthar hlim taka hmang turin duhsakna a hlan tih a sawi a ni.
TBCC dintu TT Zohmingthanga chuan chief minister tharin a tlawh nghal avangin lawmthu a sawi a. He Centre hian kum 19 a pum lek lek tawh hnu ah chief minister meuhin a rawn tlawh chu sawi a vang hle a, ruihhlo vanga thalai harsatna tawk mekte chhanchhuah duhtu chief minister kan nei tih a chian avangin a thlamuanthlak a, an lawm hle tih a sawi a ni.
TBCC-ah hian a dintu leh a nupui bakah thawktu mipa pakhat leh hmeichhia pakhat an awm a. Tunah hian ruihhlo vanga harsatna tawk damlo mi 860 an enkawl mek.
Chief minister-in a tlawh denchhen hian amah tawiawmtu Social Welfare & Tribal Affairs director Dr Lalhriatzuali Ralte chuan thipek, Rs. 50000 a hlan a ni.