Tunhnaia Hmar Students’ Association inkhawmpui a hmanpuinaah chief minister Lalduhoma chuan thudik lo a sawi nual tih Congress thupuangtu Lalbiakzama chuan a sawi a. Thu mu hnu kai tho zawng leh Mizote inkara rilru intihnat sak thei zawnga belhchian dawl lem lo thusawi chu sim atan a tha hle tih a sawi. Thuthar thehdarhtute a kawmnaah MPCC thupuangtu chuan, chief minister-in a sawi – Kum 1991/ 1992 HPC movement vanglaia Saipum khaw mite Saiphai-a tih luihnaa khawm tum an ni, a tih chu thu belhchian dawl lo a ni tih a sawi. “Tih luihna ni loin a duh tan duhthlan theiha siam a ni a, sawrkar khan rangva leh sumfai thlengin pek a inhuam a, Saipum mai ni lo Sakawrdai lamah pawh he rawtna hi siam a ni. An duhthlanna in chhungkaw engemawzat chu he rawtna ang hian an pemkhawm nia hriat a ni,” a ti.
HPC demand area-a curfew puan thinah Pu Lalduhoma’n heng hmun a tlawh dawnin, Mizoram lieutenant governor hnenah curfew hlihsak turin a ngen tih a sawi thu pawh sawiin, “Khatihlaia curfew puan khan chhunlam a huam ngai loa, zan inkhawm pawh kha hmun tam takah chuan phalsak an ni. Mizoram hi kum 1987-ah state kan ni a, khami hnu kha chuan lt. governor kan nei tawh lo,” a ti.
1993 MLA inthlanah MNF ticket-a Sakawrdai biala a din tumin vauna a tawk anga a insawi chu, hetihlaia Mizoram Police CID chhuinaah, vauna lehkha thehdarhtu hi MNF Block leh Unit hruaitute an lo ni tih hriatchhuah a ni a; Block president phei chu kohhran upa a nih avangin an naute pawhin inhmeh lo an tih thu an sawi nghe nghe tih police officer (MPS) retired Lalbiakzama hian a sawi.
“Heng thil thleng report hi tih chhiat a la nih loh chuan CID (SB) office-a an file hluiah an la kawl tha ang,” a ti.
Chief minister-in HPC-in ‘zalenna’ an sual anga a sawi chu a hriatsual a nih a rin thu sawiin, Autonomous District Council zawk an phut tih a sawi.
HPC ‘D’ pian hnu, sawrkarin inremna a zawnpui hnu ah 2018 April 2-ah Sinlung Hills Council piang turin inremna an neihpui ta a; inremna an ziah hma hian sawrkar chuan Act leh Rules a peihfel sa vek tih sawiin, “Pu Lalduhoma’n Act awm siloa Rules chauh nei angin a sawi a ni,” a ti.
HPC ‘D’ leh sawrkar inrem theihna atan a mimal leh party angin an nawr nasa nia a sawi pawh chhangletin Lalbiakzama chuan, “HPC ‘D’ leh sawrkar inbiaknaah hian Mizoram aiawh ‘Team leader’ ka ni a. Kan inbiak chhung zawng khan tuna kan CM hian vawikhat mah rawn inrawlhna a neih ka hreloa, amah leh a party hian engmah an rawn nawrpui awm pawh ka hre lo. Inbiak tum khatnaah erawh HPC ‘D’ palaiten Pu Lalmuanpuia Punte chu an spokesperson anga a tel phalsak turin min dil a, kan remtih sak,” a ti.
Chief minister-in HPC ‘D’ nen inremna zawngin an inbe mek nia a sawi chuan a barakhaih tih Congress thupuangtu hian a sawi. HPC ‘D’ leh sawrkar inbiak lai hian HPC ‘D’ inla hrang pawl tlemte, ralthuam pawh nei tam lo tak an awm a, Mizoram lamah buaina siam loin Cachar leh a chhehvel Assam lamah an chetla ber a, inbiak lai pawh hian tel ve mai turin an sawm nghe nghe zawk tih a sawi. Amaherawh chu, HPC ‘D’ chhungkuaah hruaitu lama inrem lohna awm avanga kal hrang an nihnaah, inbiaknaa tel ve hi an duh loa, chutiang chuan tun thlegin Mizoram chhungah buaina an siam awm hriat zui tur a awm ta lo tih a sawi a ni.
Hetiang a nih lai kar a, tuna Mizoram sawrkarin inbiakpui a tum chu enge an thil phut nia, enge sawrkar chuan pek a tum tih an zawt tih a sawi a. Tunah mi tlemte an ni chungin, inbiak puiin inremna siam dawn ta se, rawn pung hluai thei an ni dawn tih a sawi.
CM-in thudik lo a sawi nual “Sim atan a tha khawp mai” – Congress thupuangtu
