CM-in Union Home minister
hnenah Bana Kaih sawipui
New Delhi-a cham mek chief minister Lalduhoma chuan Thawhtanni khan Union Home minister Amit Shah a hmu a. Bana Kaih Scheme, Thenzawl Peace City leh project lian danga Mizoramin sum a mamawh an sawi dun.
Union Home minister chuan Parliament Session-ah an ngaihtuah tur thu lo hrilhin; Union Finance minister, Union Home minister leh chief minister-te nena sawi tlang a, tihhlawhtlin dan kawng dap nise, an ti.
President of India hnena la tang mek – The Mizoram (Maintenance of Household Registers) Bill 2019 chu President pawmpuina hmuh a nih thuai theihnan a lo bawhzui tur thu a sawi a. Airport Authority of India hnena Lengpui Airport hlan chungchang pawh Union Cabinet thutkhawmah an ngaihtuah tur thu a lo hrilh bawk.
Mizoramah helicopter lian zawk leh mi phur tam thei zawk service tir tura chief minister ngenna chu a lo bawhzui tur thu leh Lengpui Airport-a CISF duty tihchangtlunna tur Police Modernisation Scheme hnuaia fund dilna enzui a lo tiam a ni.
CM-in Union Home ministerhnenah Bana Kaih sawipui
