Chief minister Lalduhoma chuan Thawhtannia Zoram Medical College & Hospital Falkawn a tlawh a, an hmunhma fangin, an mamawh hrang hrang a enpui.
ZMC&H ah hian tunah zirlai 494 an awm a, intern ti lai 97 an awm. 2025- 2026 academic year bikah MBBS zirlai 100 an nei a, an zinga 70 hi state quota niin, 15 hi all India quota a ni a, a dang 15 hi non- resident Indian quota a ni. National Medical Commission chuan post graduate zirna seat 10 a rawn phalsak a. Master of Public Health zirna hi kum 2024 khan an hawng tawh bawk a, tunah zirlai 8 an awm mek.
ZMC&H ah hian MCON, RIPANS leh pharmacy college hrang hrang atangin nurse leh laboratory technician zirlaiten internship leh clinical posting programme an nei reng thin.
Department pariat – Blood Bank, Accident & Emergency, General Administration, Labour Room, Maternity OT, Paediatrics OPD, Paediatrics Ward leh SNCU chuan NQAS national certificate an hmu tawh a ni.
Tun kum hnih leh a chanve chhungin cabin thar 30 siam belh niin, a vaiin cabin khum 40 a awm tawh a. ICU pawh hi hemi hun chhung vek hian a thar 13 siam belh niin a vaiin ICU 26 a awm a ni. ZMC&H ah hian khum 519 a awm a, Mizorama Hospital lian ber a ni.
Chief minister hi Health minister Lalrinpuii leh adviser to chief minister (Finance) TBC Lalvenchhunga, MLA ten an tawiawm.
CM-in ZMC mamawh enfiah
