Daily Newspaper

CM-in Zokhawsanga insuan thuai turin AR hotu hrilh

6

Chief minister Zoramthanga chuan Nilaini zing khan a chenna CM bangla-ah Director General Assam Rifles (DGAR) Lt. General Sukhdeep Sangwan kawmin, tunhnaia Assam Rifles leh Mizoram inkara thil thleng leh Assam Rifles awmna hmun chungchang a sawipui.

Chief minister chuan Lt. General Sukhdeep Sangwan hnenah hian Assam Rifles chu an awmna tura buatsaih Zokhawsangah a rang thei ang bera insuan turin a hrilh a; hrileng vanga Zokhawsanga hmalakna thenkhat la thawh zawh theihloh awm mah se, an insuanchhuah har avangin Smart City Project hmalakna kalpui tur thenkhat a thuanawp phah tih hrilhin, a insubuai lo zawngin a hma thei ang berin a tahtawla Zokhawsanga insuan turin a hrilh a ni.

Mizoram chu ramdang pahnih nen inri an nih avangin dan loa ramri pela lutchhuak an awm thin bakah ruihhlo leh thildang tawlhru an awm thin chu a ngaimawh hle tih Zoramthanga hian DGAR hi a hrilh a, heng avang hian Assam Rifles chuan ngawrh zawka Mizoram border an venhim a tul thu leh chumi atan chuan border hnaih zawka camp an neih tul a tih thu a sawi a ni.

Chief minister chuan Covid19 laka mipui an him tlan zawk theih nan paramilitary force-te vawikhata tam tham tak an in-transfer thin chu a tul tawpah lo chuan tih rihloh a tul thu leh sawrkar laipuiah pawh a lo thlen tawh thu DGAR chu hrilhin, a ni pawhin an ngaihpawimawh thu a sawi.

Mizoram chu state ralmuang tak a nih avangin pramilitary force-te chu a chhunga chengte nen inlungrual taka awm ho zel theih tha a tih thu chief minister hian a sawi bawk.

Assam Rifles DG hian chief secretary Lalnunmawia Chuaungo pawh a office-ah a hmu a. Kum 1987 daih tawha Assam Rifles-te Aizawl khawpui an chhuahsan theihna turin Zokhawsangah hmun pek an nih thu te, state sawrkar chuan an mamawh – tui, electricity leh kawng te a siam zawh vek tawh thu te, an building hrang hrang sa tura Ministry of Home Affairs-in a ruat contractor chuan a hna a zawh thawkhat tawh thu te sawiin, Assam Rifles chu a rang thei ang bera Zokhawsanga insawnchhuah dan ngaihtuah turin a hriattir.

Ram thenawm Myanmar nena Mizoram inrina a ruka paltlangin ruihhlo leh silai tawlh ruk a awm fo thin thu pawh chief secretary hian a sawi a. Ramri venna kawngah Assam Rifles chuan hna tha zawka an thawh theih nan state sawrkar nen tha taka an thawhho a tul thu a hrilh. Mizoram chhung kawngpui (highway) hmun thenkhata phalna nei loa Assam Rifles-in check gate an siamte pawh thiat vek tura hrilhin ramri luhka (entry/exit) hmunahte chauh heng check gate hi an siam thei a ni tih DG hi a hrilh a ni.

Tunhnaia Assam Rifles chetdanin state sawrkar leh mipui rilru a tihnat thu sawiin, Assam Rifles ten thupha chawi tura a ngaih thu a lo hrilh bawk.

(THE AIZAWL POST – Tualchhung)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy