CM leh secretary-ten CS an thlah
Mizoram chief secretary Dr. Renu Sharma, IAS chu October hian superannuation pension-a chawl dawn a. Vaiwin – October 30 hi a hun tawp ni tur a ni. Thawhlehni khan chief minister leh Mizoram sawrkara secretary-te chuan a hrang ve ve in an thlah.
Chief minister Lalduhoma hian a office-ah Dr Renu Sharma hi a kawm a. Mizoram tana a hnathawh tha tak takah lawmthu hrilhin, a hun hman zel turah duhsakna a hlan a. Lawmthu sawina lehkha leh thilpek a hlan.
Chief secretary kalchhuak tur pawhin lawmthu hrilhin, Mizoram chu nuam a tih thu leh a hriatreng thin tur thu a sawi a. Mizorama a awm chhunga tha taka thawhpuitu sawrkar leh sawrkar hnathawkte chungah lawmthu a sawi a ni.
Mizoram sawrkar hnuaia secretary-ten an thlahnaah Dr Renu Sharma chuan Mizoramah hna thawka tum hnih a awm chhungin sawrkara a thawhpuite bakah mipui atangin tawiawmna tha tak a hmu tih sawiin, an chungah lawmthu a sawi a. Mizorama a awm chhungin thil tam tak a zirchhuah thu leh a hma hun zelah pawh Mizoram chu a tan hmun pawimawh tak a nih reng tawh tur thu a sawi. 1988 IAS AGMUT cadre Dr Renu Sharma hi 2021 October 28 khan chief secretary kalchhuak tur Lalnunmawia Chuaungo thlak turin sawrkar laipuiin a ruat a. Hemi kum November 2-ah a hna a zawm. Kum 2011 leh 2012 chhung khan a tumkhatna atan Mizoramah hian post a lo ni tawh a, Finance leh General Administration Department ah commissioner/ secretary hna a chelh. Kum 2016 khan principal secretary ni turin Mizoramah bawk sawn a ni a, Home leh Department of Personnel & Administrative Reforms a chang a ni
CM leh secretary-ten CS an thlah
