Kum 2008-a lumpsum aided-a dah higher secondary school 9 ten adhoc-a hlankai ngiata school khara sawrkar an kar meknaah chief minister ngenna angin vawiin, September 7 atang hian school hawn leh phawt an tum. Chutihruailin a hoa an sawina eng atangin beiseina sang tak an nei a, tih hlawhtlin sak ngei tur pawhin an beisei tih chief minister hi an ngen let a ni.
Mizoram Govt. Lumpsum Higher Secondary School Association (MIGLAHSSA) chuan sawrkara an thil phut karna atan August 29 atang khan school an khar a, heng HSS awmna khua tlawmngai pawl leh political party-te thlengin hma an lakpui. September 5 khan HSS 9-a School Managing Board chairman-te chuan chief minister Zoramthanga an hmu a. Khawtlangin school an hahpui rei tawh zia leh sawrkar intiamna anga tihhlawhtlin a nih loh chuan, inthlan dawna hma lak harsat dan turte, adhoc grant-in-aid an mamawh zia te an thlen.
Chief minister chuan school upgradation tih hlawhtlin sak leh sak loh turah thu chiang engmah a la awm loh thu leh cabinet-in a la ngaihtuah tur a nih thu Managing Board chairman-te hi lo hrilhin, an school khar mek pawh hawng turin a lo ngen a ni.
Chief minister ngenna hi zahawm tiin Managing Board chairman leh MIGLAHSSA hruaitute chuan cabinet thutlukna ngaichang chungin September 7 atangin school hawn leh phawt nise an ti.
MIGLAHSSA hian September 6 khan chief minister hnenah hian ziakin thu an thlen zui a. Managing Board chairman-te ngen anga inkawm hun a siamsak avanga lawmthu sawiin, a (CM) ngenna zahawm an tih em avangin an lungawi lohna lantir chu chawlhsan rihin, school hawn chhunzawm a nih tur thu te an hrilh. ‘Kum 2018 inthlan hmaa kan hotute lo intiam tawh ang leh i hoa kan sawi tawh behchhanin tuna kan school dinhmun atangin adhoc grant-in-aid ah min hlankai ngei kan beisei tlat a ni,’ a ti.
CM ngenna in school hawn rel Bawhzui sak ngei turin ngen let
