- Lalthansanga
Chief Minister’s Special Pakage dawngtu tur sawrkarin a thlan danah mi rintlak leh taima thlan an ni a, politics thila induhsakna a inrawlh lo tih minister Lalthansanga chuan a sawi.
Aizawl bawrhsap office chuan Aizawl district-a Bana Kaih Scheme hnuaia peng pakhat, CM’s Special Pakage dawngtu (progress partner) tan Ningani khan an hriat tur tul inhrilhhriatna a buatsaih a. Training hmanpuitu minister Lalthansanga chuan, progress partner thlan kawngah sawrkar a fimkhurin a duhtui hle a, kalphung thar mipui sawrkarah hmasawnna tak a thlen theihnan duhsak bik awm lo, thlei bik awm loin, mi rintlak, mi taima leh hlawhtling tura theihna neite chauh thlan an ni a, politics a inrawlh lo tih a sawi.
Diltu thahnem tak zingah line department-ten uluk taka an zirchian hnu a, bana kaih tlak leh chhawmdawl tlaka an ngaih an thlang chhuak tih sawiin, CM’s Special Package dawngtute chu ‘beneficiaries’ pawh an ti loa, hmasawnna tura sawkar thawhpuitu (progress partner) an ti tih a sawi a ni.
Aizawl district-ah hian department 11 hnuaiah progress partner 467 an awm a. Mizoram district zingah Aizawl district chu progress partner tamna ber a ni.
Ningani vek khan Mamit leh Khawzawl district-a CM Special Package-a an bana kaih turte tan pawh hriat tur inhrilhin kohkhawm an ni a. Mamit district-ah hian department 7-ah bana kaih tur 128 an awm a; Khawzawl district-ah pawh department 7-ah tho mi 114 thlan an ni.