Site icon The Aizawl Post

CM tehkhin thu in sawrkar hnathawk tibeidawng – MPYCC

Sawrkar hnathawkte hlawh lak hun chungchanga chief minister tehkhin thu hman chuan sawrkar hnathawkte a ti beidawng hle niin Congress Thalai chuan an sawi.
Congress Thalai Hqrs. thuchhuak chuan chief minister Pu Zoramthanga’n tunhnaia thuthar thehdarhtute a kawmnaah sawrkar hnathawkte hlawh pek hun chungchang tehkhin thua a sawi chuan sawrkar hnathawkte a tibeidawng hle tih a sawi.
‘Sawrkar hnathawk tam berte hian an thlabi hlawh hi thla thartirah lak an duh vek a, thlakipa man chawi ngai hrang hrang leh loan late tan tlai taka hlawh lak a nih hian kawng hrang hrangin harsatna an tawk thin. A hun taka hlawh lak an duh ngawih ngawih tawh laia Finance minister berin ni 1-a lak leh ni 15-a lak a la tehkhin chuan sawrkar hnathawkte a ti lungngai em em a. Sum enkawl thiam lo Finance minister Mizoramin kan nei hi pawi kan ti hle,’ a ti.
Sawrkar hnathawk pension-te pawhin an pension chhuahpui sum an khawl an lak theih loh thu sawiin, ‘Congress sawrkar laia GP Fund an mamawh ang zela withdraw thin angte kha tun MNF sawrkarah chuan vana rah ang a ni ta hi sawrkar hnathawkte ngaihpawimawh lohna lian tak kan ngai,’ Congress Thalai chuan an ti.
Finance enkawl thiam leh tawnhriat ngah Pu Lalsawta chu tun dinhmuna Mizoram sum tlachhe mek siamtha tura mamawh lian ber a ni, tiin, a laka rinna nghat tur leh lo thlawp turin mipui an sawm tih a sawi a ni.

Exit mobile version