CM zahawmna humhim turin ngen

CM zahawmna humhim turin ngen
Chief minister Lalduhoma chu mipui hnena thudik tawk lo hrilh reng lo tur leh tai nai rana thu sawi reng loa, chief minister zahawmna humhim turin an ngen tih Congress party chuan an sawi.
MPCC thuchhuak chuan, ZPM-in an sawrkar hma in sum puk an sawisel nasa em em a, chief minister ni ta Pu Duhoma phei chuan SASCI a sawisel nasa thin a. Tunah chuan ‘loan thami’ tiin a sawi leh tawh a, a awmna a sawn zin ang bawkin a rilru pawh a sawhsawn zing tih a thusawi atangin a hriat thin tih a sawi.
Sawrkar sum puk sawisel leh mipui dahkhamna ang hiala sawi thin khan tunah chuan sawrkar kaltate aia tam kumtin an puk a, an sawi angin mipui min dahkham niin a sawi bawk.
‘Assembly House-ah meuh revenue surplus nei anga a insawite hi House zahlohna leh mipui zahlohna a ni. Mipui hian thudik hriat an phu a, sawrkar langtlang an beisei laia dawt sawi a, mipui thudik tawklo hrilh hi chief minister hian bansan se, eptu MLA a ni tawh loa, CM a nih anga House-ah pawh tai nei rana thu sawi mai mai loa, CM zahawmna humhimnan puitling taka khawsa turin kan ngen a ni,’ a ti.
Budget pharh tak sawiho a khaikhawmnaah chief minister chuan, eptu lamin sawrkar hnathawk enkawlna leh sawrkar inrelbawlna – revenue expenditure a san thu an sawi chhanglet a, revenue receipt rau rauah kan hmuh tur aia kan hman chhuah tlemna cheng vaibelche 889.84 a tling a, revenue surplus a ni, tia a sawi leh; Mizoramah revenue surplus awm vawihnihna a ni, tia sawi chu sawi chhawngin, ‘Revenue surplus hi sawrkar kum 5 tih loh chu a awm char char zawk a, ZPM sawrkar hma 2013- 2014, 2014- 2015 (vbch. 141.33) leh 2020- 2021 (vbch. 774.12) ah chauh revenue deficit hi a awm zawk a, ZPM sawrkar hnu 2024- 2025 ah revenue deficit hi vbch. 26.97 (actual) leh 2025- 2026 ah vbch. 376.41 (RE) a awm a ni,’ a ti.
Kumin budget-ah revenue surplus vbch. 899.84 awm tura chhut lawk (estimate) niin, a tak takah chuan kum hmasa angin a letling thawkin a rinawm tih MPCC thuchhuah hian a sawi a. Kum hmasa kum hnihah revenue surplus awm tura chhut lawk ni ve ve mah se, a takah chuan revenue deficit a ni tih a sawi a ni.
ZPM sawrkar hnu in sawrkar inrelbawlna a pung awk awk nia sawiin, MNF sawrkar kum hnuhnung ber 2023- 2024 ah 77.89% a ni a; 2024- 2025 ah 85.94%, 2025- 2026 ah 82.51% in a pung a, 2026- 2027 ah 82.54% hlawh leh inrelbawlnaah a kal ral dawn tih a sawi.
‘Leiba a pung awk awk a, kum 2017- 2018 ah sawrkar leiba vbch. 7300.30 (actual) a ni a. Kum 2018- 2019 ah vbch. 15.25 in a pung. 2019- 2020 ah vbch. 1356.24, 2020- 2021 ah vbch. 1209.3, 2021- 2022 ah vbch 689.84, 2022- 2023 ah vbch. 422.16, 2023- 2024 vbch 1089.17, 2024- 2025 ah vbch 2168.03 in a pung a ni,’ a ti.
Sawrkar kum thar 2026- 2027 ah phei chuan leiba tlingkhawm hi vbch. 19085.15 tling tura chhut a ni a, budget pumpui vbch. 17076.92 ai pawhin a tam zawk a, hetianga budget aia sawrkar leiba a tam zawk hi a la thleng ngai lo tih a sawi a ni.