CMA Awards 2025-ah Lainey Wilson, Ella Langley leh Riley Green an langsar
Country Music Association (CMA) Awards 2025 chu nimin tuk khan an sem ta a, country music a musician hot ber berte chu award semna Nashville-a Bridgestone Arena-ah an pungkhawm. Kumin hi CMA Awards an sem vawi 59-na a ni a, Lainey Wilson-i’n award semna show a host a, 1991-a Reba McEntire-i’n amah a show a host hnua, hmeichhiain mahni chauha he award show an host leh hmasak ber a ni.
Kumin hian country music legend Vince Gill chu Willie Nelson Lifetime Achievement Award hlan a ni a, he award i George Strait, Alan Jackson, Dolly Parton leh Kenny Rogers te pawhin an lo dawng tawh.
A competition lam pawh a hot khawp mai a, award ngaihhlut ber Entertainer of the Year-ah Lainey Wilson, Luke Combs, Cody Johnson, Chris Stapleton leh Morgan Wallen te nominee an ni a, he category hian ngaihven a hlawh hle a, award dawng tur rinlawk hleihtheih loh khawpa chetha tlang an ni. Female Vocalist of the Year category-a pawh Kelsea Ballerini, Miranda Lambert, Ella Langley, Megan Moroney leh Lainey Wilson te awmin, he category-ah pawh award dawng tur rin lawk hleihteih a ni lo.
Hetihrual hian award hum aw ringawt kha show-a lansarhna pawh a ni chuang lo a, an performance pawh a hmuhnawmin beng a titlai hlawm khawp mai. Ella Langley, Megan Moroney leh Luke Combs te pawh a performance hmuhnawm leh chetha pawl an ni.
Kumin hian hmeichhe lam an langsar zawk a, award ngaihhlut ber Entertainer of the Year hi show host ni bawk Lainey Wilson-i’n a dawng a, a album ‘Wirlwind’ avangin Album of the Year a dawn bakah a lungthu kim nan Female Vocalist of the Year a dawng bawk. Lainey hian award pathum dawngin, a langsar ber a ni ta a ni.
Leiney Wilson hian tun kum thum chhungin entertainer of te year hi tum hnih a dawnna a ni a, hmeichhe zaithiam zingah he award hi tum khat aia tam dawng thei pathumna a ni a, Barbara Mandrell (1980 & 1981) leh Taylor Swift (2009 & 2011) ten tum hnih ve ve an lo dawng tawh bawk.
Lainey Wilson hian female vocalist of the year pawh a zawnin tum li a dawng tling ta a, he category-a a zawna tum li chin award dawng thei pathumna niin, Reba McEntire (1984-87) leh Miranda Lambert (2010-15) te hnung a zui ve ta. He award hi Martina McBride pawhin tum li a dawng tawh nain, a kum zawnin a dawng lo a, Carrie Underwood pawhin tum ruk dawng tawh mah se a kum zawnin a dawng lo.
Ella Langley leh Riley Green te pawh an chetha hle a, “you look like you love me” hla avangin Single of the Year leh Song of the Year an dawng a, he hla music video avangin Music Video of the Year an dawng bawk.
“you look like you love me” hi kum 1976-a Waylon & Willie Nelson hla “Good Hearted Woman” hnua solo artist pahnih zai dunna hla single of the year dawng leh thei hmasa ber a ni. 1976-ah chuan Langley leh Green te hi an la piang lo.
Brooks & Dunn ten vocal duo of the year an dawng leh a, tum 16 an dawnna niin, he category-a award dawng ngun ber an nihna sawhnghet leh ta sawt a, hei bakah hian CMA Awards an dawn zawng zawng pawh 20 a tling ta a, CMA Award dawng hnem ber an ni ta bawk. A hma chuan Chris Stapleton nen award 19 dawngin dawng hnem ber an ni ho a, mahse, kuminah Stapleton hian award a dawn tak loh avangin an kalsan ta a ni.
CMA Awards 2025 dawngtute chu:
Entertainer of the Year : Lainey Wilson
Single of the Year : “You Look Like You Love Me” – Ella Langley & Riley Green
Album of the Year : Whirlwind – Lainey Wilson
Song of the Year : “You Look Like You Love Me”; Songwriters: Riley Green, Ella Langley, Aaron Raitiere
Female Vocalist of the Year : Lainey Wilson
Male Vocalist of the Year : Cody Johnson
Vocal Group of the Year : The Red Clay Strays
Vocal Duo of the Year : Brooks & Dunn
Musical Event of the Year : “Pour Me a Drink” – Post Malone (feat. Blake Shelton)
Musician of the Year : Paul Franklin – Steel Guitar
Music Video of the Year : “You Look Like You Love Me” – Ella Langley & Riley Green
New Artist of the Year : Zach Top
CMA Awards 2025-ah Lainey Wilson, Ella Langley leh Riley Green an langsar
