Chief minister-in secretariat hran neia office a kalpui chuan tul loah sum a ti hautak hle tih PC president Vanlalruata chuan sawiin, CMO hranpa nei lo ila heng sum hi thildanga hlawkpui taka hman theih a ni tih a sawi.
Ningania an party office bearer thutkhawmah PC president chuan minister dang 11 enkawlna aiin chief minister enkawlna hi a hautak zawk tih sawiin, “Council of Ministers budget hi a pumpuiin budget tharah hian cheng nuai 713.18 a ni a. Hemi atan hian 2021- 2022 khan nuai 603.91 hman a ni. Kum kal lai, 2022 -2023 budget ah nuai 702.34 ruahman a nih laiin, nuai 754.04 hman tur anga sum dil belh a ni a; kum hmasa aia cheng nuai 150.13 a tam hman a ni tur anga lang hian rilru ah zawhna a siam tam a. Kum kallaia sum hman aia tlem budget thara ruahman a ni leh lawi hian hmasawn tumna felfai awm loh zia a tarlang,” a ti.
Council of minister budget-a zaa 55.14, cheng nuai 393.25 chu minister 11 enkawlna tur niin, a bak zaa 44.85, nuai 319.93 chu chief minister enkawlna tur a ni thung tih a sawi a. Hetianga CM enkawlna hautak em em chhan hi CMO (Chief Minister’s Office) tia sawi thin, Chief Minister’s Secretariat hranpa, kan neih vang a ni tih a sawi.
CMO enkawlnan hian 2021- 2022 khan nuai 255.94 hman niin, kum kal lai 2022- 2023 hian a tirah nuai 250.23 hman tura chhut a ni a, nuai 273.23 hman leh zawk tura ruahman nawn a ni tih Vanlalruata hian sawiin, ‘Budget tharah hian nuai 274.39 hman tura ruahman a ni a. CMO hranpa nei lo ta ila, thildang tulah kan hlawkpui viau dawn a ni,’ a ti.
Heta senso leh senso tura ruahmanah hian venhimna lama CMO senso leh a bangla enkawlna senso a la tel lo tih a sawi bawk.
CMO hautak lutuk ngaimawh
