Grand Slam title pakhat lek lakbelha tennis player piang chhuak tawh zawng zawng zinga major title la hnem ber ni mai thei tawh tur Novak Djokovic chuan a hmachhawp hi a tipuitling thei hlek lo a, hmabak lianpui nei ul chunga a chawlh nge nge a ngaih mai a hlauhawm chhoh tawh laiin coach thar a han ruai leh ta phawt a, French Open-ah hian a chefuh dawn em kan thlir leh pauh a ni’ang chu!
Tuna a head coach thar rawih hi a thian hlun leh a chipui ni bawk Viktor Troicki niin, karleh maia khelh tan tawh tur Roland Garros tournament-ah Serb pahnih thawkdun hian Grand Slam title 25-na la zo tak ang maw?
World number one hlui Djokovic hian Instagram kaltlangin a coach thar lawman a tarchhuak a, “Welcome thianpa, ka team-mate ni bawk, tuna coach ni ta… Viktor Troicki,” tiin.
Troicki hi Serbia Davis Cup captain a nih laiin anni pahnih hi an lo thawkdun tawh thin a, kum 2024 khan Djokovic-a’n Paris Olympics gold medal a lakna kawngah Troicki hian coaching lamah a puibawm bawk.
A hmain kum 2010 khan player ve ve ni chungin Serbia chu a vawi khatna atan Davis Cup title an lakpui tawh bawk.
French Open 2026-ah pawh Troicki hian vawiina kum 39 tling chho chiah tur Djokovic hi theihtawp a chhuahpui leh dawn a; January thla Australian Open final-a a tlawm hnuah hliamin tibuai fo mah se major title pakhat tal sualchhuah leh phawt loha chawlh lam la hawi thei lo Djokovic-a tana pawimawh hle tura ngaih inrintawkna neihletlehna kawngah a coach thar hian a puih theih chuan Paris tournament atan chu chu a tangkai khawpin a rinawm!
A dar na la dam chiang hlei thei lo avangin kum khat chhunga grand slam tournament vawi hnihna leh clay-court major awmchhun ni bawk French Open atan Djokovic hian inbuatsaihna a nei chau hle a, Pathianni mai hi tournament khelh tan hun a nih tawh bawk si avangin beisei a sang leh vak lo!
Champion tura rinkai leh world number one ni mek Jannik Sinner erawh a rah chin apiang a ram tih ang mai kha a ni chho mek a, record ropui bik hnutchhiah zo loin Djokovic hi a kalbo ve nge nge lo ang tih a sawi theih loh!
Coach thar nena beiseina thar nei Djokovic!
