Coaching lama insawrbing tum tawh Vana

Professional bul a tanna leh a inhnek tawpna ni nghal turah karliamta Zirtawpni zan khan LPS Pro Fight boxer hlawhtling berte zinga mi HC Johnkenty Vanhlimpuia chuan Bosch Home Appliances LPS Fight Night lightheavyweight round hnihnaah technical knockout-in Pushpak Verma a hneh a, coaching lam luhchilh a tum avangin tun kha a inhnek tawpna tur a nih a beisei thu a sawi nawn leh.
LPS Arena chhunga mipui sang hnih chuang pung khawm hmaah kum 27 mi Vana’n round hnihna tirah chiang takin a lu-ah a hneksak a, um zuiin hruihrual kilah a hual chep a, na tak taka a hnek zawn laiin Rajasthan boxer Verma a talbuai a, inven bak ngaihtuah theih a neih tawh loh avangin referee Malsawmsanga’n inhnek a titawp.
Round hnihna tan atanga second 40-ah Tuipui boxer a chak a, kum nga leh thla li chuang hnua Mizorama a inhnek leh hmasak berah a chetthat a chhunzawm a; a inhnek ngaihlutu Mizo mipui chungah lawmthu a sawi nghal.
Indian Navy chhuanvawr Vana hian March ni 12, 2019 khan LPS Pro Fight lightheavyweight title fight-ah round khat khel zo loin amah chotu Hrianghmun tlangval DK Munga a knockout a, tun hi Mizorama a inhnek leh hmasak ber niin, professional a luhchilhna inkhel a nih rualin a tawpna tur a ni nghal!
Pro Fight middleweight-a vawihnih a champion zawn hnuah kum 2016 khan lightheavy-ah a insawn a, he huangah hian Mizo leilunga a inhnekpui hnuhnun ber Verma nen knockout hmangin tum sarih a chak zawnna a ni.
Kum 29 mi Jaipur tlangvalin Mizoramah hun chhia a hmang ve thung a, professional a luhchilh atanga tum thum a inhnek thlengin a chak vek a, mi pahnih a knockout. Vana hmaah a vawikhatna’n professional huangah a tlawm.
Verma hi chawpchilh taka sawm a ni a, Vana hmaah a inringtawk lo tih a khelh dan atangin a lang a, mipui beiseina inhnek a lantir zo lo.Inhnek dang
Laldinsanga’n hnek tluk a tumna tihlawhtling zo lo mah se Zirtawpni zan Bosch Home Appliances LPS Fight Night-ah a hma aia chiang zawkin Ramdinthar a hneh nawn.
Kum 21 mi Dinsanga’n knockout theih ngei a inring a, thiamna leh thahrui tha tak nen inhnek thunun zawk mah se round ruk a inhnek hmasak berah Pangzawl tlangval Ramdina a ding tluan.
Ramthar Lunglei boxer-in round tin la vekin judge pathum point pekah 60-54 vekin a chak a, professional boxing vawisarih a khelhna niin, a chak vek a; kum 23 mi Ramdina erawh nikum LPS Pro Fight bantamweight title fight ang bawkin Dinsanga lakah a tlawm nawn a, an intawn vawihnih hi professional huanga a inlan tum hnih a nih avangin a tlawm ve ve a ni.
Nikum November khan LPS Arena-ah hmuhnawm takin an innuai tawh a, rin hlawh zawk Dinsanga’n inlehthalna pumpelh derthawng takin a chak a, a hmun ngaiah bantamweight-ah bawk a intawng leh a ni.
Lalruatzela Hauzel chuan Lalmuanpuia hnehin professional huangah a chak zawn a; Zirtawpni zan Bosch Home Appliances LPS Fight Night inhnek dangah Vanlalenkawltir leh Lalrinngheta an inhnehtawk.
Ruatzela’n round li la vekin judge pathumin 40-36 vekin an chaktir a, professional a luhchilh atanga a inhnek hmasak pahnihah tlawm zawn mah se nikum Pro Fight welterweight title fight nen vawihnih a chak zawnna a ni.
Kum 21 mi Muanpuia’n welterweight-a a khelh hmasak berah chet a harsat a, professional boxing a khelh tum hnihna niin a tlawm ve ve a ni.
Super flyweight-ah Dinthar Champhai figher Enkawla’n a vawikhatna’n professional boxing-a chak a tumna a tihlawhtling zo lo a, amah aia kum khata upa, Tuipui tlangval kum 22 mi Rinngheta nen round li an inbeih hnuah judge pakhatin 40-36-in round tinah a chaktir a, mahse, judge pahnih 38-38 ve ve an pek avangin an inhnehtawk phah ta a ni.
Professional huanga 2022 Pro Fight bantam champion Rinngheta inlan vawilina niin, khelh thum a chak zawn hnuah a chak zawh loh hmasak ber a ni a; Enkawla erawh vawihnih a inhnehtawkna niin, tum khat a tlawm tawh a, chak a nei lo zui zel.
Emmanuel Vanlalthlengliana leh L Joseph Buihringpachha chuan Bosch Home Appliances LPS Fight Night-ah unanimous decision-in Benjamin Lalrindika leh H. Zomuanpuia an hneh.
Zirtawpni zanah Falkland-ah amatuer inhnek tum hnih awmin light flyweight-ah Melthum boxer Thlenga’n round thum a la vek a, kum 18 mi Didika lakah 30-37, 30-27, 30-27-in a chak a ni.
Featherweight-ah Siaha rawlthar Joseph-a’n round thum an inhnek hnuah 29-28, 30-27, 30-27-in Muanpuia a hneh ve thung a; an pahnih hian Khelo India Centre of Excellence hnuaia inzir lai niin sang tak thleng thei tura beisei an nih angin boxing hmuhnawm pangngai takin an lantir a; kum 15 mi, veikhawr Joseph-a’n amah aia kum khata upa Kolasib rawlthar lakah thiamna a nei tha takin a entir a ni.
Inhnek tan a nih hmain hun hawnna’n kum 10 hnuai lam naupang pangain LPS Arena chhung khat tlata mipui pungkhawm hmaah boxing thiamna an lantir a, an hma lam hun atan leh naupang dang fuihphurna’n lawm hlawh takin an inlan a ni.
Amatuer inhnek vawihnih bakah professional inhnek vawili a awm a, tluang leh hlawhtling taka zawh a nih rualin Organising Committee chuan Mizo mipuiin Mizo tlangval inhnek an ngaihlu hle niin a hria a, lawmawm a ti hle a ni.