Coco Lee thihnain China-ah nghawng nei

Pop singer Coco Lee thihna chuan Chinese tawng hmang khawvel a barakhaih hle a, chutih rual chiah chuan China social media lamah chuan mental health issue sawihonain hmun a luah nghal bawk.
Lee kha mahni intihhlum tuma chet a lak hnuah chhanchhuah hman niin mahse engmah hre lo coma in hun rei tak a awm hnuah kum 48 niin a boral zui ta a ni.
Lee unaunu Carol leh Nancy te chuan an unau chuan kum tam tak chhung depression a neih thu an sawi zui nghal bawk a.
China, Hong Kong-ah chuan milar niin American singer a ni a, zaithiam zet mai niin khawvel hriata lar a ni bawk a. A thihna pawhin m a barakhaih hle a ni.
A thih hnu hian Lee-in depression a neih chuan titi a luah hneh hle a. “I bul hnaih depression nei an awm em” tih te “depression symptoms” tih te chu social media platform hrang hrangah a trending zui nghal hle a. China state media outlet CCTV, People’s Daily leh China Daily te ang chian mipuite hnenah depression leh mental illness lam hrilh hriat zuaina an neih zui phah bawk.
A bik takin China-ah a ni telin mental health issue nei an pung tia sawi a ni a. Chinese society-ah depression emaw mental illness chu stigma anga ngaih niin rilru lama hrisellohna chu Chinese tawng chuan ‘jingshen bing’ tih niin a nihna takah chuan inentleuna leh diriamna kawk niin mi a chu ‘shenjing bing’ an ti thung a, mental health issue nei chu mi pangngai lovah an ngai thin.
China-a depression emaw nei te chu enkawl mang lovin an awm thin tiin Ke Ren, founder of social media account “Depression Research Institute” chuan a sawi a. “School ah result duh ang a neih loh avangin building sang atangin a zuang thla” tih te kan hre thin a. Mahse, eng nge thleng dik tak zawh fiahna hun kan nei ngai lo va, engtianga tanpui ngai nge an nih pawh kan hrefiah ngai lo tiin Ren chuan a sawi.
Tun hnai kum 10 atanga 15 chhungin China economy a thang duak duak a, chutih rual chiah chuan mimala pressure a sang hle bawk. China mipuite chu school a inelna te, hnathawhnaa inelna te chuan tichauin mental health lam ngaihsakna a nasa lo thei lo, tiin Dr Miao, Shanghai New York University chuan a sawi.
“Mi tam tak he natna vei hi an awm a, mahse, an chhung leh thiante hrilh an hreh a, professional te puihna pawh an dawng duh lo a ni,” tiin a sawi bawk.
Kum 2019 a China Mental health Survey neihah Chinese khua leh tui pasarih zinga pakhat zelin mental illness an nei tih a ni a.
Kum 2015 daih tawh khan tech giant Huawei dintu Ren Zhengfei chuan depression leh anxiety-in a bawh buai nasat tawh thu article-ah a ziak a. Tech company Sohu dintu Zhang Chaoyang pawhin depression a neih thu langtlang takin a sawi bawk.
Pandemic leng leh China-in khauh taka ‘zero-Covid’ policy a kalpui chuan mipuite a nghawng na hle bawk a. Pandemic lenlai khan mental health issue a nasa hle a ni, tiin Dr Miao chuana sawi bawk.
China-ah hian psychiatrist 64,000 chauh an awm niin China Youth Daily chuan sawi a, hei vang hian mental health issue lamah kawng thui tak zawh tur a la nei an ti bawk.