Tun hnai khan Mizo Students’ Union chuan Higher & Technical Education minister Dr Vanlalthlana an hmu a, college zirtirtu zinga qualify lote chu sawrkarin an contract tawp hnuah pawhsei sak tawh lo tura an ngen bakah heng zirtirtute chu harsatna siam loa tawp zui ngam turin an ngen, tih an sawi bawk a.
Hemi chungchangah hian nikum khan MSU hruaitute hian chief minister an lo hmu tawh a. Sawrkarin college zirtirtu unqualified (NET/PhD nei lo) 29 te kum khat dang hun a pek belhte chu huaisen taka ban ngam turin an lo ngen tawh a. Heng unqualified teacher rawih mekte hi an qualify theih nan vawi tam tak hun pek belh leh hun pawhsei sak an lo ni tawh a, chuti chung chuan an la qualify thei lo a, sawrkar erawhin a la ruai chhunzawm zel niawm tak a ni.
Hemi chungchangah hian college zirtirtu qualify lote an contract period kumin February 28-a tawp turah, pawhsei a nih loh tur thu minister-in notification a tichhuak tawh bawk a ni.
Minister-in hun pawhsei a nih tawh loh tur thu notification a tih chhuah tawh ber chuan, tuna unqualified teacher-te hi chuan an chhunzawm tawh lo tura ngaih a ni a, February ni 28 hnu lama qualified teacher-te lak dan turah erawh eng mah thu thar hriat tur a la awm lo niin a lang.
Eng pawh ni se, qualified rawihna tura unqualified rawih an ni hrim hrim hi, Mizoramah hian college teacher thawk tura qualified hi an lo awm mang lo nge tih hi zawhna awm thei a ni awm e. College teacher ni tura paltlang ngai NET/PhD hi kan zirlaite hian an paltlang hleithei lo a nih chuan, kan ram zirna quality hi a ngaihtuahawm viau tihna em ni dawn?
Chuti ni lo a, qualified teacher an tam em em laia qualified lo ber kher eng vanga sawrkar chuan ruai nge a nih tih hi zawhna pawimawh tak a ni a. Zirlaiten ‘ruai tawh suh u’ an tih lawm lawm ngaia sawrkar a awm a nih chuan, tling leh tlak zawkte rahbehna a thleng tihna a ni a, hetiang hi thleng zui ngai tawh lo se a duhawm hle a ni.
College zirtirtu qualify lote….
