National Highway-54 laih zauh leh siamthat hna thawh mekah Serchhip district-a zangnadawmna la tawh, mahni in la thiat lo te chu Thawhlehni khan executive magistrate-te kaihhruaiin endik a ni a, in pakhat thiah sak a ni.
NH-54 kawngpui laih mekah Serchhip district huamchhunga sawrkarin ram a lakfel tawh, dan anga zangnadawmna – compensation leh rehabilitation and resettlement sum dawng tawh te zingah in leh lo thiat duh lo luite hi kumin July leh August khan magistrate-ten an inah kalchilhin an in thiat tura thupek ‘eviction notice’ pek an nih bakah November 22 khan Competent Authority for Land Acquisition (CALA), district bawrhsap David Lalthantluanga chuan a hmunah tlawhin an thiah loh chhan a endik a ni.
Hemi hnu hian in la thiat lo an awm avangin Thawhlehni khan executive magistrate Lalhruailiana Zote leh Dr Albert Vanlalruata bakah Serchhip SDPO PB Singh te chuan Chhingchhip khuaah kalin, in la thiat lo hi a hmunah an tlawh leh a, Chhingchhip Venghluna Lalthuthlunga Hnamte s/o Lalnunthari chuan an in hi an la thiah loh avangin khawl hmangin thiah sak an ni. Chhungkaw pahnih dang chu an in an thiah mek avangin thiah sak ngai loa thiat chhunzawm zel tura hriattir an ni.
In thiahnaah hian Serchhip atangin police thahnem tak kalin kawngpui enkawltu NHIDCL leh contractor-te bakah khawtlang hruaitute an tel a. Buaina leh harsatna awm loa hma lak niin, district thuneitute chuan zangnadawmna la tawh, mahni in la thiat lo te chungah dan anga hma lak chhunzawm zel a ni dawn tih an sawi a ni.
Compensation la tawh In thiat duh lo thiah sak
