Daily Newspaper

COMPOUND WORD KAN ZIAH DAN BIH CHIANNA

23

Iril Fanai; Camp: ZTN

Facebook leh Whatsapp vela ri tam em em mai chu compound word ziah dan hi a ni. Parts of speech hmanga teh duah duaha pawh phel duh chuan ngaihtuah peih chhung a awm kan ti a; a ni lah tak a, taimak dan azirin a bua chhuah tham pawh phel tur kan hre thuai maiin ka ring.

Compound word chu ‘thumal ni sa pahnih emaw, a aia tam emaw hmanga thumal thar (new word) siam’ hi a ni a. Kan ziah zawm emaw, ziah zawm lo emaw, thumal (word) a ni tihna a ni a; kan ziah dan avangin compound a niin a nih loh phah lo a, compound a nih chhan zawk chu thil eng emaw sawi nana thumal tan khawmtir a nihna zawk hi a ni.

Thumal tang khawmte chu an inhrilh fiah tawn (modify) zo lo vek a, a mal malin PoS-ah dinhmun an nei zo lo bawk. A zavaia tang khawm chuan noun emaw, verb emaw, adjective emaw, a eng emaw ber a ni tawp thin a. Parts of speech hmanga teha dah hran ngawtin awmzia a nei thei lo; a tan kawpa a va sawia tak kha a pawimawh zawk a ni. Entir nan,

LUMET:
Lu hi noun a ni a, met hi verb a ni leh a, transitive verb leh a object inzui a ni a, ziah hran tur ti ila, a awmzia chu, ‘lu leh met’ inzui ve naran, noun + verb lu met a ni a. Lu + hiat (noun + verb)= lu hiat tih inzui ang chauh a ni dawn a. Eng sawina vak ni loin, lu leh met dah dun a ni mai. A awmzia a bo thak dawn asin. Mahse, lumet khi a grammar-ah chuan ziah hranin emaw, ziah zawmin emaw noun + verb ni loin, mi lu/sam mehsaktu (barber) sawina noun thumal (common noun) zawk a ni. Hei hi grammar-a a dinhmun dik tak zawk a ni.

Dan naranin a thumal awmze hmasa (lexical) laka hrang chi exocentric compound kan tih kha ziah zawm thin a ni a. Chu chu awmze danglam deuh a neih vanga a ziah dana thliar hran niin, a tehfung angrengah ‘semantic criterion’ an ti a. Chutiang chi chu kan ziah zawm thin a, tih thin dan a ni a, ziah zawm zel tur a ni. Amaherawhchu, awmze hran nei ta chuang lo chi pawh kan ziah zawm tho a, dan a awm thei lo. Tukkhumvilik kan ti a. A tukkhumah thil invilik a awm vang a ni a. A awmzia a ngai reng a, awmze danglam (idiomatic meaning) a awm miah lo; mahse, kan ziah zawm tho. Eng vang nge kan tih chuan, compound word ziah dan formula a awm lo a, tih thin dan hi compound word ziah dana grammar dan a nih vang a lo ni. Zirna sang zawk thlenga grammar lam zirte zirlai bu angah te, khawvel huapa pawm tlak Oxford grammar bu te, grammar dictionary te, linguist-te siam linguistics encyclopedia, langguage and linguistics dictionary, morphology etc., hrang hrangah te pawh hetiang hian formula a nei tiin an ziak ngai lo; a chhan chu, a nei lo miau a ni.

Awmze danglam nei chuang loa ziah zawm thenkhat
Leirawhchan Khawnvartui
Tuikhur Lungalhthei
Thirtiang Kekawrte
Kekawr etc.

Hetiang hi pawt phel ila, noun, adjective tih velin sawi ta ila, a grammar riauin kan hre dawn em maw ni. Ni lo, mi mal ngaih dan mai mai a ni. Bakah, compound-a kan hman chuan a mal malin PoS-ah dinhmun an nei zo lo bawk. A grammar-ah chuan noun thumala chher ve hrim hrim a ni. MLC kan ti thin a. A chhan chu, mahni ngaih dan champion-pui tum an lo awm thin a, inhnialna te a awm lo thei lo a. Chutianga min thelhtu leh rualkhaia min hruaitu atan a that vang a ni a. Chutiang chu hre thiama lung kan rual a ngai a ni. A nih loha mahni ngaih dan ringawt kan buaipui dawn chuan, ngaih dan nei kan tam nasa mai si a, engtin nge ni ta ang?

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy