Congress-in candidate 22 puang leh

ASSAM INTHLAN:
Congress-in candidate 22 puang leh
Assam-a assembly inthlan lo awm turah Congress chuan an candidate tur mi 22 hming an puang leh ta a, thla leha seat 126 awmna assembly inthlan turah candidate 87 an puang tling ta.
Ningania hming an puan 22 zingah hian MLA Asif Mohamad Nazar-a pawh a tel leh a, Laharighat assembly bial atangin a chuh leh dawn a ni.
Nagaon Lok Sabha MP Pradyut Bordoloi-a chuan Laharighat biala Nazar-a dintir leh hi a duh lo va, a ding dawn a nih chuan party a chhuahsan tur thu a lo sawi tawh a. Manifesto siam tura Assam Congress panel kaihruaitu, Bordoloi-a hian party thutlukna siam hun pawh nghak chhuak lovin Nilaini khan rorel lai, BJP a zawm tawh a, Dispur-ah an lawm lut tawh.
Congress chuan Ranganadi bial chu Asom Gana Parishad (AGP) palai ni thin, Jayanta Khaund-a hnenah a hlan a, tun thla tir lam khan Congress-ah a lut a ni.
A tum thum nana candidate puanah hian MLA tang laite pawh an tel a. Party Working President Jakir Hussain Sikdar chu Pakabetbari bialah a ding dawn a; Aftab Uddin Mollah (Jaleshwar) pawh tel lehin Abdur Rahim Ahmed (Chenga) leh Pradip Sarkar (Abhayapuri) te an la tel bawk.
Congress hian an thawhpui, Assam Jatiya Parishad (AJP), CPI (M) leh All Party Hill Leaders Conference (APHLC) tan bial 15 an kian a, Raijor Dal chu party pali awmna tawhna eptu tangruala teltir tumin an dawr mek bawk.
Assam Congress President Gaurav Gogoi-a chuan Ningani khan Raijor Dal President Akhil Gogoi-a a kawm leh a, hmalak mek a nih thu a sawi.
Gaurav-a chuan, “Inremna kan siam thei a nih chuan harsatna a awm lo vang, kan thlen theih leh theih lohah a innghat vek,” a ti a. “Assam mipuite chuan eptute inpumkhatna hmuh an duh a, eptu party hrang hrangte inpumkhatna zau tak siam turin mi malin theihtawp ka chhuah a ni,” a ti bawk.
Akhil-a’n chuan Raijor Dal tana bial 13 dinna pek a phutna chu Gaurav-a hian a thlawp thu a sawi a; mahse, party hruaitute atangin thutlukna erawh a la dawng lo tih a sawi bawk.
“Kan thawhho a ngai tih kan sawi tawh a; mahse, Ningania inbiakna hi a la hlawhtling lo va, Gaurav Gogoi-a’n bial 13 a rawt chu Congress hruaitute hnen atangin pawmpuina a la awm loh avangin he thil hi thutlukna siam a la ni lo,” tiin Akhil-a chuan a sawi.