Congress-in tih hlawhtlin leh theih loh tur a zuar ve ngai lo – Dr Lalmalsawma

Congress-in tih hlawhtlin leh
theih loh tur a zuar ve ngai lo
– Dr Lalmalsawma
Congress party chuan a tih hlawhtlin theih tur chauh a zuar thin a, party dang chuan an mumang an zawrh thin avangin ram mipui beidawnna thlentu a ni thin tih Congress treasurer Dr Lalmalsawma Nghaka chuan a sawi.
Aizawl District Congress Committee chuan Nilaini khan ‘media training’ an nei a. Hmanpuitu MPCC treasurer Dr Lalmalsawma chuan Congress party-in manifesto a siam reng rengin a tih hlawhtlin theih ngei loh tur a siam ngai lo, tiin, “Kan manifesto-a kan dahte hi zirchian sa a ni zel. AICC-a mithiamte leh Mizoram leh India ram hmun hrang hranga mithiamte rawnin, a road map uluk taka duang lawkin hma kan la thin,” a ti.
ZPM leh MNF ten zirchian tak takna awm loa mipui hnenah an tih hlawhtlin theih loh tur mumang an zawrh thin ang chu ram mipui tan a him loa, beidawnna thlentu mai a ni thin tih a langchiang hle tih a sawi.
Health care chungchang ringawtah pawh Congress sawrkar laiin a hun taka mipuiin health care bill an la zat zat thei thin kha, dam lo mangangten an chhuiletin an ngai vawng vawng niin MPCC treasurer hian a sawi. “MNF sawrkar khan health care bill kha a kum a kum an batsak thin a, mipui an mangang hle. ZPM a sawkar a, research base-a kal inti si in, thla 6 an sawrkar hnu-ah October – March 2025 atan health care bill hi chhungkaw khat tan cheng nuai 1 an ti thei hram a, natna khirkhanin a tlakbuakte tan a beitham hle,” a ti.
Tun sawrkarin Mizoram Universal Health Care Scheme atana Asian Development Bank atanga sum puk a tum chu vaibelchhe 1004.64 niin, zaa 80 (vbch. 799.22) chu loan portion a ni a, a bak vbch. 205.22 chu state counterpart funding tur a ni a. He loan hi sawrkar laipuiin grant to state hmanga a rulhpui hnuah pawh cheng vbch. 79.92 hi Mizoram sawrkarin a la rulh tur a ni tih a sawi.
“Inthlan hmaa sawrkarin loan a lak, duh lo em em leh tha ti lo em em thinte khan vawiinah chuan sawrkar kal tawhte aiin sum an puk tam chho mek. Sawrkar sum ti hek zawnga facilities leh hlawh ti pung thur thurte hian Congress-in NLUP kan kalpui, mi harsa berte hnena cheng nuai khat lut kha, sem an ti a nih chuan, mirethei zawkte tham lohna a ni. Kan enchhin sawrkar, tha bik tura insawite hian MNF sawrkar an tluk loa, Congress sawrkar phei chu tluk lo tak a ni,” Dr Lalmalsawma hian a ti.