Congress MP candidate-ah MPS retired Lalbiakzama

Congress party chuan Lok Sabha inthlanpuia an candidate atan MPS retired Lalbiakzama an ruat.
MPCC president Lal Thanzara chuan an candidate hi Nilaini khan Congress Bhavan-ah a puang a. Lalbiakzama chuan tunlai India ram boruak inlumlet hlauhawm zia hi chiangkuang zawka Mizo mipui kan inhrilhhriat a ngai tih sawiin, chumi tur chuan hma an la dawn tih a sawi.
“Tun ang reng renga India ram dinhmun a derthawn hi a la awm ngai lo a. Kehchhiat mai pawh thil hlauhawm a ni mai em, tih mi tam takin an ngaihtuah. Ngaihtuahna seng nasa, historian leh intellectual circle an mangang ru em em a, heng ho nena tangkhawm hian tun tum inthlanah pawh INDIA hi rin aiin an chetha ang tih ka ring a, chumi lo pui ve tu ni tur chuan Mizoram mipui hi ka sawm a ni,” a ti.
Congress MP candidate Lalbiakzama hi 1960 March 1 khan Aizawl Venghluiah a piang a. Vairamah seilianin kum 1979 khan Mizoramah an rawn chuang chhuak a. English leh Hindi thiam nal tak niin, hnamdang dawr tura mahni inringtawk leh tawnhriat ngah a ni tih MPCC president Lal Thanzara chuan a sawi.
Kum 1988-ah Mizoram Police Service a zawm a. HPC an hel laiin, operation hotu-a a tan bakah 1998 khan UN Mission Bosnia-ah a kal a. Bosnia khawpui ber dawttu Tuzla-a an police station pakhat enkawltu hna a chelh. 2002 kumtawpah UN Mission Kosovo-ah a kal leh a. Induction Training Center (UN-a thawk tur police officer-te Mission-a an awm chhunga an hnathawh dan tur kaihhruaina hmun) ah general instructor a ni. UN SAT Team (Selection Assistant Team) a tel thei tur – khawvel ram hrang hrang atanga UN a thawk tur police officer-te thlangtu training paltlangin Turkey khawpui Ankara-ah UN SAT Team-ah a tel bawk.
Aizawl Traffic SP a nih laiin, lirthei tlan dan tur leh lirthei khalhtu leh kea kal mipui himna atana ruahmanna thar engemawzat a siam a, tun thlenga la hman zui a awm nual. Krismas leh kumthar vuakveta Chanmari leh Zodin Square inkar No Vehicle Zone hman ngaihtuaha kalpui hmasa bertu a ni bawk.
Home department joint secretary leh secretary a nih laiin, Bru hel hmachhawn kawnga hma la nasatu zingah a tel a. Hemi kawngah Mizoram sawrkar leh Tripura sawrkar aiawhte inbiak thinnaah Mizoram team a ho thin. Mizoram sawrkar leh HPC ‘D’ te remna zawnga inbiaknaah Mizoram Team leader niin hlawhtling takin inremna an ziahpui a ni.