Daily Newspaper

Congress Party chhung buainain reh lam pan lo

41

Congress party chhunga thuneihna inchuhna chuan reh lam a pan thei lo va. Rajya Sabha a Leader of opposition Guhlam Nabi Azad chuan president Sonia Gandhi hnena ngenna an siama Congress Working Committee (CWC) member leh State tin president te chu a thlana thlan ni rawh se an tih chu an la kalpui zui zel.

He mi kaihhnawihah hian Sonia Gandhi chaun party chhung thuneihna sawi danglamna neiin Lok Sabha leh Rajya Sabh-a tha taka chetlak a nih theih nan committee pahnih a din a.

Mahse, he hmalakna hi Ghulam Anbia Azad leh Rajya Sabha-a Deputy Leader Anand Sharma te thuneihna chhuhsak tumna angah a ngaih theih thung a, an pahnih hian Congress inkaihhruainaa zawhna neia Sonia Gandhi lehkhathawna hming ziak tu zinga tel ve ve an ni.

Sonia Gandhi hnena lehkhathawn ziaktu zingah khan hruaitu 23 an tel a, chung zinga meizanghlaptu bera ngaih chu Ghulam Nabi Azad a ni a. Azad chuan PCC leh block Congress a elected president te chuan worker te thlawpna 51% an neih laiin a ruata ruate chuan 1% thlawptu pawh an nei lo tiin a sawi.

“Inthlanin hlawkna a neih chu inthlan i hmachhawn chuan a tlem berah i party mi leh sa 51% te chuan an thlawp ang che. Tunah chuan president a ruata ruat chhuah chuan thlawptu 1% pawh a nei lo mai thei. CWC member te hi thlan ni se chuan paih theih loh an ni dawn a. Eng nge buaina tur awm le,” tiin Azad chuan a sawi a.

“Office-bearers tinte emaw State unit president emaw block district president emaw te kan rawtna beilettute hian inthlan nei chiah ila engmah an thleng lovang. Kan lehkhathawn kha Congress thatna duh tak tak te chuan an thlawp ang,” tiin a sawi bawk.

Congress party chhunga hruaitu lawk thenkhat lungawi lote dinna pheh nan Sonia Gandhi chuan thutlukna siamna kawng chu zau zawka siamin Rajya Sabha leh Lok Sabha-ah group hnih a siam ta a ni.

Rajya Sabha group-ah hian Sonia Gandhi political secretary hlui Ahmed Patel, senior leader Jairam Ramesh (Chief Whip a dah thar) leh general secretary (organisation) K.C. Venugopal bakah Azad leh Sharma te an tel a.

Lok Sabha-ah chuan party leader Adhir Ranjan Chowdhury bakah Gaurav Gogoi, Deputy Leader atana dah thar, Chief Whip K Suresh leh whip Manickam Tagore te an tel thung.

Punjab MP Ravneet Singh Bittu chu whip-ah dah niin lungawilo zinga tel Shashi Tharoor leh Manish Tewari te chu telh an ni ve lo thung.

Heithlai hian Shashi Tharoor chuan leadership debate chu tawpsan tawh tur tiin ngenna a siam a, “Tun hnaiah ni 4 chhung ngawi rengin ka awm tawh a, a chhan chu Congress President-in buaina te kan kalsan tawh a tih vang a ni. Party tan a tha thei ang bera thawk tura chet lak hi kan mawhphurhna vek a ni a. Ka thawhpui tin te pawh he principle hi chawi nunga inhnialna tawp san turin ka ngen a ni,” tiin a tweet a ni.

A hma lawkah erawh Kapil Sibal chuan UP congress tena lehkhathawn ziaha hming lang zinga tel Jitin Prasada laka chetlakna an neih chu nasa taka sawi selin, “Vanduaithlak takin Jitin Prasada chu UP-ah tumbikin a awm a. Congress te hian surgical strike hmangin BJP te beih zawk tur a ni a, mahni mi leh sa te beiha tha sen loh tur” tiin a tweet a ni.

(THE AIZAWL POST – Ramchhung)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy