Congress sawrkar loh hnuahLeiba lamah hma kan sawn – MPCC treasurer

Congress sawrkar loh hnuahLeiba lamah hma kan sawn – MPCC treasurer
Congress a sawrkar loh hnu kum 7 chhung hian leiba lamah Mizoram-in hma a sawn tih Congress hruaitu Dr Lalmalsawma chuan a sawi.
Zirtawpnia Congress Bhavan-a inkhawmah MPCC treasurer Lalmalsawma Nghaka chuan, kumina state budget cheng vaibelchhe 17469.92 a nih laiin, state leiba chu vbch 19085.15 a ni mek a, kan leiba hi kan budget aiin a sang der a. Kum hnih chhungin vbch 6375.86 in a pung hman a, ZPM sawrkar term tawpah phei chuan vbch 25000 chuang a ni hman dawn nia a lan thu a sawi.
“MNF sawrkar khan leiba a ngah thu hahipin kan sawi a, mak kan ti a. Kan sawrkar hrawn mek hi sum enkawl thiamah inngai mah se, an thiam loh zia a lang a, chhiarkawp thiam pangngai chuan a punna hi kan hrethiam vek. Congress khan leiba a pun lohnan theihtawp kan chhuah a, kan sawrkar loh hun kum 7 chhung hian leiba lamah hma kan sawn a, ZPM sawrkar hi leiba tih pun lamah an champion chho mek a, MNF sawrkar a rawn pel ta,” a ti.
Kum 2023 inthlan campaign laiin minister-te khualliana an tang thin kha tul lo an tih hle laiin, tunah hian chief minister chauh pawh vawi 94 khuallianah a tang tawh a, hnathawh ni (working days) atanga chhutin khualliana a tan ni hi a tam hle tih a sawi.
MNF sawrkarin sum dinhmun a tichhe nasa nia sawi nuaibo intiam ZPM chuan PWD ringawta restricted tender amount kum hnih chhung belhkhawm chu Rs. 10,67, 98,54,293 a ni tawh a. Heng hna atang hian GST 18% leh labour cess 1% la ta se, sawrkar sum hum tur chu Rs. 202,91, 72,315.67 a ni tih Dr Lalmalsawma hian a sawi. “Hei lo liama corruption hi a awm thei lo. Duhsak zawngte hna inpek hmiah hmiah hi corruption a ni,” a ti.
Kum hnih chhung kawng chhia mipuiin kan tawrh tawh hnuah sawrkarin a siam a, social media lama an infak vak chu a zahthlak tih MPCC hruaitu hian a sawi. “Kan kawng hi mipui chhiah atanga siam a ni a, mipui siam zawk a ni. Mipuiin oil kan thun apiangin litre-ah Rs.2 kan thawh a, lirtheia eizawngte hian thla tin Rs. 1000 chuang thawh ziah ang an ni. Sawrkar hian mipui hnenah lawmthu a sawi tur a ni,” a ti.
AMC inthlan turah MNF leh ZPM-in mi lar leh hausa an thlang chhuak a. Congress chuan mipui tana rawng bawl thin, midang tana nun hlan thin, khawtlang leh ram tana inhmang an thlangchhuak a, Congress chu danglamna (change) thlen tum tak tak an ni, tiin, mipuiin an en mek tih a sawi a ni.