Congress ‘Sawrkar Tha’ tlangzarh “Sawrkar thaah retheih a zahthlak”

Congress party chuan an manifesto “Sawrkar Tha” an tlangzarh a. An party president Lalsawta chuan sawrkar thaah chuan retheih a zahthlak tih a sawi.
Thawhlehni khan Congress Bhavan-ah 2023 MLA inthlanpui neih tura Congress party Manifesto No.2 “Sawrkar Tha (Good Governance)” tih chu MPCC president Lalsawta hian a tlangzarh a. Manifesto chu sawrkar huna tih tum chauh lam niloin, sawrkar hmain mahnia lantir a, vei a, a taka nunpui tur a ni, tiin, sawrkar tha siam chu an tum tak tak a, hlenchhuah ngei pawh an tum tih mipuiin hriatpui se a duh tih a sawi.
“Sawrkar thaah chuan thil tha tih a awlsam a, thil sual tih a harsa thin. Sawrkar tha loah chuan hausak a zahthlak a, sawrkar thaah chuan retheih a zahthlak. Miretheite hmuhsitna lam a ni loa, retheite dinchhuahna tur sawrkar tha siam tumna a ni a, chu chu kan kal dan tur a ni. Mipui retheih laia sawrkar hotute hausak hi sawrkar tha lo zia a ni,” a ti.
Sawrkar hnathawkte chu sawrkar kutke ber, a tak taka thawktu an ni a. Duhsak tlak an nih avangin duhsakna an dawn chu an duhpui tih Lalsawta hian a sawi. Chief minister, minister leh MLA te chu langsar leh lian takin angin lang mah se, sawrkar hnathawkten a nihna ang taka an thawh avang zawkin ram hmel a danglam thin, tiin a sawi.
“Sawrkar hnathawk pension tawhte, pension mai tur leh pension mekte tana tha zawk Old Pension Scheme kalpui hi kan tlin a, kan thei bawk. Mizorama sawrkar hnathawk awm hmasa ber atang vawiin thlengin Old Pension Scheme hmanga pension vek an ni a, kan tlin reng a ni. Tunah hian new pension atan kumtin nuai 4500 chuang kan hmang reng a. Old pension sum pek ngai bawk, new pension atana sen ngai bawk hi Mizoram tan a hautak lutuk. Congress party kan sawrkar chuan sawrkar hnathawkte hlawh bakah hamthatna hrang hrang – DA, DR, CP Fund leh pension benefit-te hi a hun takah pek an ni dawn a ni,” a ti.
Congress manifesto no. 2-a sawrkar tha siam dan tur tarlan tlangpui chu – corruption awm lohna sawrkar, dan rorelna, langtlang sawrkar, thuneihna sem zai ngam sawrkar, smart government leh sawrkar viak tha leh mipui rin ngam, tihte a ni.