Tunlaia hming sawi hlawh tak Kamrul Chhangte chuan Congress sawrkar laiin contract cheng nuai 4400 chuang man hna a thawk tih adviser to chief minister (Technical) Er K Lalsawmvela chuan a sawi.
Zirtawpnia MNF office, Mizo Hnam Runa thu a sawinaah Er K Lalsawmvela chuan Kamrul Chhangte hi Congress sawrkar laia tribal certificate pek, Congress sawrkarah contract hna lian deuh deuh hmun 8-a hmu a, cheng nuai 4400 chuang man hna thawk a ni tih a sawi a. Abu Majumdar-a chu Mizoram chief minister hnena palai tura Assam chief minister-in a tirh a ni tih a sawi bawk.
“Opposition party-ten an sawi ber Abu Majumdar hi Congress sawrkar hun lai atanga Mizoram buhfai supply-tu ber a ni a. Assam leh Mizoram police inkah khan Assam chief minister chuan Pu Zoramthanga biak a duh a, Abu Majumdar ruaiin palaiah a rawn tir a. Delhi-a chief minister pahnihte inbiakna thlalakah Abu Majumdar chu lo lang ve in, social media-ah Pu Zoramthanga hruai angin an puh hlauh thung a, Assam chief minister hruai zawk a ni,” a ti.
Lengpui Airport chu Pu Laldenga sawrkar bul tan, sawrkar a din rei loh avangin Congress sawrkarin a chhunzawm ta tih adviser to CM hian a sawi a. Bawngkawn to Chanmari road zim lutuk pawh Pu Laldenga sawrkarin huaisen takin a zauh a. Pu Zoramthanga sawrkar hmasaah Bawngkawn to Durtlang kawng siam a ni a; tun sawrkarah Durtlang to Sihphir kawng tender a chhuak tep tih a sawi.
“Aizawl to Lunglei World Bank kawng hi MNF sawrkar hmasa kutchhuak a ni a. Millennium Centre, Aijal Club, MINECO-a building ropui tak tak te, Ch.Chhunga Bus Terminal, Ch.Saprawnga Truck Terminal leh sawrkar building lian tak tak hi MNF siam vek a ni. National highway pali kan neihte hi MNF sawrkar hmasa kutchhuak vek a ni bawk,” a ti.
Covid hrileng karah development tam tak zingah 2019- 2022 khan PWD hnuaiah kawng km.615 sial thar a nih thu te, Hunthar lei tlahniam kawng pawh sawiselbo a nih tak thu te, tun sawrkara building 43 sak zingah MINECO-a High Court building-te chu a lian zual zing ami a nih thu te MNF adviser hian a sawi a ni.
Congress sawrkarah Kamrul-a’n nuai 4400+ man hna thawk – CM Adviser
