Site icon The Aizawl Post

Consultancy firm pahnih khat kutah sports hmasawnna tur sum a lut tam – Zodintluanga, MLA

Tunhnaiah infiammite tana hmasawnna thar aiin consultancy firm pahnih khat ten sport hmasawnna tur sum tam tak an hailut ruih ruih chu pawi a tih thu Congress MLA Zodintluanga chuan a sawi.
Thorang Assembly bial tana ‘MLA Cup 2023’ Thenhlum khelmuala buatsaih a hawnnaah Thorang bialtu MLA Zodintluanga Ralte chuan tunhnai kum 4 chhung leka infiammite tana hmasawnna thar hmuh tur aia, Mizorama consultancy firm pahnih khat ten sport hmasawnna tur sum tam tak an hailut ruih ruih mai chu pawi a tih thu sawiin, hengte avang hian infiammite chu an rilru tihnual mai lo turin a chah.
A bial chhung mai bakah Mizo thalai infiammite tan kawl a eng leh thuai dawn, tiin, “Infiammite politics khelhna atana hmang ve lo tur leh Mizoram rorelna sang ber Assembly-a an hming hial mualpho taka lam ri lo tur sawrkar kan nei leh tep tawh a ni,” a ti.
Kum 2008-a Congress sawrkar a pian khan thalaite infiamna khawvela lang turin theihtawpa hma an lak nghal thu Zodintluanga hian a sawi a. Catch Them Young programme kalpuiin, infiamna khawvela thalaite lang turin infrastructure tha an pe tur a ni, tiin, kum 5 chhungin hmasawnna tam tak an hmuh hman thu a sawi a ni.
Thorang Constituency Football Tournament-ah hian an bial khaw hrang hrang atangin team 17 an tel a ni.

Exit mobile version