Daily Newspaper

Consultative Committee-in dan zawm tha turin BSF chah

60

Consultative Committee on Health & Family Welfare chuan state dang atanga Mizorama an post-a lo haw khawm Border Security Force (BSF) te chu state sawrkar ruahman Covid kaihhnawiha khunghran dan tur tur duan te chu khauh taka zawm turin an hrilh.

Consultative Committee on H&FW hian an chairman, Health & FW minister Dr R. Lalthangliana hoin Nilaini khan Aizawl khawpui chhunga khunghranna hmun thenkhat an tlawh a. Falkland-a Rajiv Awas Yojana (RAY) building-a BSF sipai, India ram hmun hrang hrang atanga lo haw mi 100 khunghran mekte an tlawh a, Thawhlehni zan khan an zinga 5 chu Covid-19 positive an ni tih hmuhchhuah a ni. July 2 atang khan he hmun hi khunghranna atan luah tanin ni 21 chhung an khunghrang dawn a. An swab sample hi vawihnih test a nih tawh a ni.

Consultative Committee chuan BSF-te chu sawrkarin khunghran dan tur a ruahmante khauh taka zawm turin an hrilh a, a bikin an chhehvela awm khawtlang mipui leh local task force-te nen harsatna an neih loh nan fimkhur hle turin an hrilh a ni.

SIRD Hostel Leitan tlawhin, mi 44 awm theihnaah tunah hian naupang 3 telin mi 29 an awm mek a, an zinga 14 te hi swab sample RT-PCR test negative tawh niin, harsatna dang an neihloh chuan chhuahtir thuai tawh tur an ni a, midang 15 hi swab sample la lak loh an ni.

Mualpuia R. Dengthuama Hall pawh an tlawh a, he hmun hi transit centre atan hman ni tawhin state pawn atanga lo hawte screening tih thin a ni. R. Dengthuama Hall Annexe hi khunghranna atan hman chhunzawm ala ni thung a, mi 6 an awm mek. Hemi hnua an tlawh Mission Vengthlanga SAI Hostel-ah mi 74 khunghran an ni a, heng zinga 23 hi naupang an ni.

Consultative Committee chuan khunghran chungchang hi fimkhur leh khauh lehzuala kalpui tul an tih thu sawiin, Mizoram pawn atanga lo hawte chu a theih chin chinah Aizawla khunghran nghal thin nise tha an tih thu an sawi. R. Dengthuama Hall an chhuahsan hnua Aizawl pawna haw tur an nih chuan an hawna tur district leh khua bakah an paltlang tur district thuneitute nen tanghoa lo vil chhunzawm tula an hriat thu an sawi. Mimal lirtheia lo hawte pawh an chawlhna leh ei leh inna hmun thlenga fimkhura dan zawmtha turin an chah.

Heng khunghrannate hi medical team-in an vil reng a. Khunghran an nih atanga ni 5-10 inkarah swab sample laksak thin an ni. Ni 14 an hman zawh hnu ah an sample endika hri an kai loh a, insawiselna an neihloh chuan in lamah inkhung zui tura chhuahtir an ni. Khunghranna hmuna awmte hi COVID-19 Committee on Psychological & Social Guidance member-ten vilin naupang khunghrante inawmtleina tur bakah rilru lama harsatna neite a tul angin counselling an pe thin a ni.

Consultative Committee chuan quarantine facility hrang hrangte enkawl danah lungawithlak an tih thu an sawi a. Mizorama Covid-kai enkawl mek 79 zinga 64 (81%) chu hnamdang sipai, para-military force an ni tih sawiin, an ni pawh fimkhur lehzual turin an chah a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy