Lallunghnema
Charity Lodge
Cont: 9862288182
Chhiartute in zavaiin chibai ka bûk a che u. Kumin atan chuan kan hun hnuhnung a ni dawn ta!
Ka article lo hluttute hnenah lawmthu ka sawi e. Kum thar lamah Consumer Huang kan nei thei leh turah ngai ila, Consumer – te khawvel din turin kê kan pên chhunzawm theih ka beisei. Kumin chhung hian Consumer mimal harsatna eng emaw zat ka thawhpuite nen kan buaipui thei a. Lui luang lai châwl lo ang maiin Consumer Complaint ka la dawng zel a. Dawrkai leh sumdawng be reng rengin kan hman hlel a; thil châkawm lo tak, huphurhawm tak a ni thin. Mahse, Pathian zarah 100% – in hlawhtling lo mah ila, min pantu te zinga a tam zawk kan la hlawhtlinpui thei hi kan lawmna tikimtu a ni.
Hetiang thil leitu leh hmangtute venhim hna hi a nêp lo hle a. Mi va biaksak a ni satliah lova, hrilh hriat a tul a. Mi chapo leh induh tawk tak tak, kan Customer – te engamaha ngai lo thil zuartute leh service provider va biak fuh chang a awm lo thei lova, mahse tha takin kan inrem thei tho thin. Kan lawm thin tih bâk sawi tur a awm lo. Mi pawh kan harh chhuak ta zel a. Bungraw thleng theih loh tih mawi taka târ thinte pawhin an la thla mêk zel a. MRP aia sânga thil hralh thinte pawhin MRP aia hniamin an hralh chhuak tan ta bawk. Bungrua ‘deliver’ tha duh lote pawhin an mawhphurhna leh an dinhmun hriain an Costumer – te tih lawm loh chu ‘sualah’ , an ngai tan ta bawk a. Thil zuartu leh dawr nghaktute zingah tam takin an Customer – te tihlâwm an intihhmuh tan a. Customer Satisfaction chu an thupui a lo ni chho mek ta bawk. Mahse, sual thhisen kai la thing thka thei lo an la tam em avangin consumerte tharna a la awm zel tho a ni. Consumer – te pawimawhna hre thiam apiang an dingchang dawn a ni.
Centre For Consumer Education Programme pawimawh ber zinga pakhat chu Consumer Awareness Outreach hi a ni a. Centre For Consumer Education chuan he Programme hi kum 2025 chhung hian hmun hrang hrangah a lo kalpui tawh a. Programme thar lâm tha tak, hautak lo a ni a. Consumer Outreach hi Centre For Consumer Education chuan a theih chen chen chu an kalpui zel dawn a ni.
Kumin 2025 chhung hian Aizawl khawpui chhungah hian Consumer Outreach Programme chu vawi 5 kan nei hman a ni. A lawmawm hle. Heng Programme kan hmanna tam zawkah hian Legal Metrology – in min ho thei a. Media lam pawhin min tawiawm tha em em bawk a. Kan hmalaknate hi zan leh zing news – ah puan darh a ni zel bawk a. Hetiangin tawiawmna tha leh thawhhona tha hi kan beisei piah lam thil a ni. Heng Consumer Outreach kan neihte chu Zoram mipui tam takin TV leh YouTube – ahte an lo thlir a. Mipui lam pawhin min lo thlawk hle zel a. Dawrkai leh Sumdawng tha lo tam tak karah pawh dawrkai leh Sumdawng kan hmalâkna tha min lo tihpuitu an pung zel bawk a. A zawngchhang tlak hle a, programme hlawhtling tak kan nei thei a ni.
Consumer Protection hi a tul hle a, Corruption do nan a hmanraw tha tak a ni a. Thil zuartuten dik tak leh fel taka an tih chuan nasa takin hlem hlêna te chu a lo kiam thei dawn a ni. sum tam tak mipuiin kan hum theih phah bawk ang. Thil leitu leh hmangtu rethei tak takte chu tun thlengin rah behin an la awm a. An tuarnate a lo tawp theih nan kan bei zel dawn a. Hma kan la zel dawn a ni.
Hmanni lawk December ni 12 khan New Marketah hian Consumer Outreach Programme hman a ni a. Min Venghimtu Police-in min tawiawm tha hle a. Kan kalna apiangah hma min hruaisak a. A thlamuan thlak hle a ni. Heng Bazarpui vela kan dawr tlawhte chuan min lo dawng sawng tha hle a ni. MRP thai chhiat, rate phuah chawp erawh hmuh tur a la awm zel a. Hengho hian hremna a tawh loh nan an thil sual tih hi bansan thuai se, a tha ang. Mipui bum zâwng khera sum dawn hi a kristian lo êm êm a ni.
Thil zuartuten inhralh tam an duh avanga Krismas sale, krismas discount tia an inzawrh nasa karah hian kei erawh engmah lei lo turin ka intiam ve leh rup mai!
Aw le, ni tha in tan,
Mas & Kum thar chibai tak tak ka hlan a che u.
In awmna apiangah thil dik tan tlattu lo ni zel ang che u!