Nimina World Consumer Rights Day hmanpuitu Food Civil Supplies & Consumer Affairs Minister B. Lalchhanzova chuan, consumer te’n dikna leh chanvo an neih theih nan sawrkarin theih tawp chhuah zel a inhuam a; Consumer Protection Act, 2019 danin a phut angin consumer-te thubuai rem turin State Consumer Disputes Redressal Commission din a ni tawh, a ti a. Consumer-te pawh, an dikna leh chanvote hre chiang tura a duh thu sawiin, Mizo mipuite hi consumer awareness chung changah than harh kan ngai, a ti bawk.
Minister thusawi hi a dik vek. Sawrkar pawh, mipuite pawh, consumer rights-ah hian thanharh kan ngai nasa hle. Mizoram Consumers’ Union lam pawhin consumer rights-ah hian awareness campaign an kalpui tha thawkhat a, mahse mipui lam hian kan bengkhawn lo khawp mai.
Thil man MRP chungchangah ringawt pawh, sawrkar leh MCU lamin vawi duai lo mipui hrilhhriatna an kalpui tawh a, tunhma ai chuan hma kan sawn deuh a, MRP ang lova thil hralh dawrkai engemawzat pawh thubuai siam sak an ni tawh awm e.
Hetih lai hian, taxi rate leh sa man bithliah kawngah hian thuneitu lam hian consumer rights an humhalh that a pawimawh hle.
Two wheeler taxi a awm tan 2017 khan taxi rate, Km khatah Rs 10, a dawt leh Km khat zelah Rs. 5 tih a ni a. Petrol man te a lo to chho a, 2021-ah rate thar siam niin Km khatah Rs 25, a dawt leh Km khat zelah Rs 15 tih a ni leh ta a. Taxi-te hian fare meter an hman loh avangin tlan hlat zawng hi ‘rinthu’ veka kalpui a ni a, hetah hian consumer-te tawrhna nasa tak a thleng a ni. Petrol a to avanga taxi rate tihsan a nih hian, labour te hlawh chu a sang ve chuang lova, service provider-te hamthatna chauh siamsak a ni. Taxi service zingah sawrkar rate ring lova anmahni siam chawp ‘stand rate’ an tih hmang thin an la awm lehzel bawk.
Taxi pangngai rate pawh Km khatah Rs 50, a dawt leh Km khat zelah Rs 40 tih a ni a. Hei pawh hi Meter hman a nih loh avangin rinthua kalpui a ni a, consumer-te rights pawngsualna a ni bawk. Lengpui airport khu Bawngkawn traffic point (main junction) atangin Km 31 a ni a, a rate pangngai ang chuan Rs 1250 tur a nih laiin taxi service-te hian Rs 1500 an la a. Ramrikawn atang pawhin Rs 1500 tho an la a ni awm e. Langsar taka inrawkna (unfair overcharging) a ni ber. Minister-in consumer rights day-a a sawi, consumer-ten an dikna leh chanvo hrechiang tura a duh thu a sawi ang hian, mipuite pawhin kan dikna leh chanvo humhalh turin taimak chhuah a ngai a, sawrkara thuneitute lam pawhin consumer-te harsatna hi an en chiansak ve deuh chu a ngai a ni.
Consumer Rights
![](https://theaizawlpost.org/wp-content/uploads/tap_logo-min-large.jpg)