Lallunghnema
Charity Lodge
Cont: 9862288182
Consumer Huang chhiartute chibai ka bûk a che u.
Chawlhkar tina ruah tham loh article ziah hi thil namên lo tak mai a ni a. Thupui thlan bik nei ka nih avang hian duhzâwng leh châk zawng a ziah ngawt theih loh a. Mipui chhiar theih tur, mipui chhawr tangkai theih tur, thil dik lo dova, thil tha tih a nih theih nâna ziak ka ni ber a. Chuvangin a hau tak ru ve khawp mai.
Thu ziah tur tha neih a ngaih bâkah hriselna tha neih a ngai a. Chhungkaw hrisel neih a ngai bawk. Rilru hah tak chunga thu ziah hi, ‘theih loh’, tluk a ni. Chhiartute min puihna leh fuihna pawh ka mamawh. Min tawngtaisak teh u, ka ti hial a ni.
Han ti ve khang lâng ila, kum 25 chuang zet zawt chu Consumer lam article hi ka ziak ta a ni a. Ka lawm hle a. Chanchinbu hrang hranga Editor-te nena kan thawhhona rah a ni a. Aizawl Post Editor-te nena kan thawhhona zar a ni a. Ka lawm hle a ni. Hei hi Pathian hruaina ka ti lo thei lova. Buai tak chungin hei ka la khawr pum ve zel a. Harsatna pawh ka pal tlang ve nual a ni.
Tunah pawh hian buai chung chungin ka ziak a tul ka ti si, kan mamawh ka ti si a. Ka thulh thei ngang lo a ni e.
Tichuan, kan thupui hmasa zâwk hi, ‘Consumer te hi Lal kan ni’, tih a ni a. Lal kan ni ngawt lova. Dawrkai leh sumdawngte siamtu kan ni a, tung dingtu kan ni bawk. Thil sual leh thil dik lo, tha lo dotu kan ni a. Chutih rualin keini consumerte pawh hi dan dik taka thil leia hmang tur kan ni. Thlir ringawt tur kan ni lova, rinawm taka thil dik lo do tur kan ni.
India Hnam Pa M. K. Gandhi kha Consumer nihna a chiang (well versed) tak a ni a. Consumer- te pawimawhzia leh an tel lova khawsak theih a nih lohzia hre chiangtu a ni. MK Gandhi chuan, ‘Customer(Consumer) chu dawrkaite tana inleng pawimawh ber an ni a. Dawrkaite kaiten an rah chiah hian Consumer – te chu VIP anga lo en tur an ni, ’a ti hial. Sapho hlei hlei khuan Consumer – te hi an dah pawimawh a ni. Consumer – te Lal an nih dan hetiang hian sawi a ni.
(1) Bazar lal chu Consumer
(2) Pawisa kawltu chu Consumer
(3) Hausa ber chu Consumer
(4) Thuneitu ber chu Consumer
(5) Hneh theih loh chu Consumer
(6) Engkim bul leh tawp chu Consumer
(7) Ram economy thununtu ropui ber chu Consumer
(8) Consumer tel lo chuan sumdawnna a tâwp.
He thu ril leh thûk tak ‘Consumer Is King’ tih phuah chhuaktu hi American sumdawng lian Marshall Field a ni a. Customer satisfaction ngai pawimawh em em tu a ni. Kan ramah hian sumdawng hausa zingah Customer satisfaction ngai pawimawh engzat tak awm ve ang maw?
Mizorama dam lote tidamtu Doctor leh Hospital te, dam lo hrim hrim te lo inhriatfiah theih nan he thu hi ka ziak duh a ni.
Heti hian Sap tawngin ka han tarlang phawt dawn a ni. “Mohali Fortis told to pay Rs 50 lakh for patients death due to medical negligence” tih hi! He thu ziak thin thawng tak hi CAG International Group-ah kan thawhpui Prof.Murthy, CAG, National Convener chuan a lo post a ni a. An thu lâkna hi Hindustantimes.com. 3. Aug, 9 (a.m ist) tih a ni a. Consumer Advocacy Group International-ah hian member tam tham tak kan awm a. India ram State hrang hrang atangin Consumer Activict-te kan fuan khawm thin a ni. He Group-ah hian India ram chhung hmun hrang hranga Consumer Commission Judgement-te post a ni thin a. Tuna kan sawi mek hi Amrinder Singh, Punjab State-a miin a thawh (contributed) a ni.
Punjab & Haryana State High Court – a Ukil hnathawk lai Harit Sharma chu natna khirh tak avangin Mohali Fortis Hospital – ah enkawl a ni a. A tawi zawngin sawi ila, enkawlna dik lo an pek avangin a nunna a chan phah a ni. A chhungten he Damdawi in hi Chandigarh District Consumer Disputes Redressal Commission – ah an khing a. Thiam loh chantirin Mohali Fortis Damdawi in chu Rs 50 lakh chawi turin Judgement tih chhuah a ni a. District Consumer Commission chuan thu tlûkna a siam ta a ni. He Damdawi in hi Unfair Trade Practice leh Deficiency – in service ti (committed) a puhin Fortis hi hrem a ni ta a nih chu!
Mizoramah hian Doctor-te, Damdawi in te hi kan dah chungnungin kan dah pawimawh hle mai. Kan ngai sang hle bawk. Doctor fakawm tak tak, mihring mihrinna ngai pawimawh an awm laiin entawn tlâk lo Doctor hmuh hrehawm tak tak hi an awm bawk thin. Chutih laiin dam lo hawihhâwm lo tak a awm theih bawk. Dam lo chapo a awm theih a,dam lo inngaitlawm tak, inthlahrung mi an awm bawk a ni.
Eng pawh ni se, a pawimawh ber chu, ‘Damna’, hi a ni a, Doctor – te hi kan damna kawltu leh kengtu an nih avangin an inenfiah fo a ngai a. An nung chang leh awmdan hi kan thlir reng a ni. An fel chuan an tana tha tur zel a ni. An Patient – te hi sum kawltu an ni a, Doctor-ten an pawisa an lo dawng mai chauh a ni. ‘Patient is king for Doctor’, tiin kan article hi ka titawp e. Long live Consumer kan ti e.