Contract pawtsei Rashford
2022-23 season-a Manchester United player of the year award leh Players’ Player of the Year award dawng-tu Marcus Rashford chuan June 2028 thleng Old Trafford-a cham zui turin inremna thar a ziak tih Thawh-lehni khan Premier League club thuchhuah chuan a tarlang.
England forward Rashford-a contract neih lai hi nakkuma tawp tur a ni ve tawh a, tun dinhmuna an goal thuntu pawimawh a nih avangin hun rei zawk chhawr turin an thlung nghet zui ta a ni.
Kum 2016-a United tana bul a tan hnu khan a club vawn lai tan game 360 a khel tling thuak tawh a, inelna hrang hrangah belh-khawma goal 123 thun tling tawhin, chu’ng zinga goal 30 tehreng chu season liamta (2022-23) maia a khung niin, a team chu Eng-lish top flight-ah pa-thumna a nihpui.
Kum 25 mi hian contract thar a ziah hnuah club website kal-tlangin thu leh hla a nei zui a, “Kum sarih mi lek ka nih laiin mangphan duhawm tak nen Man-chester United ka zawm a, he club thuam ka inbel apiang hian hmangaihna, inchhuan-na leh hlawhtling tura tumruhnain min bawm-in, min nawr reng a ni.
“He club mak ropui takah hian tawnhriat mak leh ropui tak tak ka nei nual tawh a, mahse, thil tam tak hlawh-chhuah tur ka la nei a, kan hma kum lo kal leh turah hian trophy tam zawk lak tumin ka rilru leh taksa hi a chawl thei lo,” a ti.
English striker chuan sawizawmin, tuna a tiam theih chu an club tawnsan theih ber tawngbaw tura a theihtawp a chhuah dawn thu leh inthlakna pindanah tumruhnain a tuam thin tih a sawi a, an manager hnuaia phurna sang tak a neih thu a tarlang tel.
Manchester United Football Director John Murtough pawhin kum 18 kaltaa an club academy a zawm hnu khan Marcus hian Manchester United player ni chungin hlawhtlinna tam tak a tawngbaw tawh tih a sawi a, talent nei tha tak ni chunga inngaitlawm leh a hnaa inpe zo, hlawhtlin zel duha tuihal reng tiin a fak ve bawk.
Contract pawtsei Rashford
